Журналіста Паўла Свярдлова асудзілі на 15 сутак

Суддзя суда Маскоўскага раёна Менска Таццяна Матыль прысудзіла Паўлу Свярдлову, абвінавачанаму ў лаянцы матам, 15 сутак адміністратыўнага арышту. Адбываць пакаранне журналіст “Еўрарадыё” будзе на Акрэсціна.

Разгляд справы журналіста, як паведамляе сайт “Еўрарадыё”, адбываўся без адваката. Адваката, які прыехаў у суд, у залу судовых пасяджэнняў так і не пусцілі. На падставе таго, што журналіст нібыта адмовіўся ад яго паслуг. Пасля таго, як напачатку разбіральніцтва сам запатрабаваў прысутнасці адваката ў судзе! Адвакату паведамілі, што азнаёміцца з матэрыяламі справы ён зможа пасля вынясення прысуду.

22 чэрвеня, а 10 гадзіне раніцы, Паўла Свярдлова пяцёра невядомых у цывільным затрымалі і без усялякіх тлумачэнняў закінулі ў мікрааўтобус. Дзе ён знаходзіўся некалькі гадзін пасля затрымання, не вядома. Але а 14 гадзіне журналіст змог патэлефанаваць у рэдакцыю і паведаміць, што знаходзіцца ў судзе Маскоўскага раёна, дзе яго будуць судзіць па артыкуле 117.1 за "дробнае хуліганства".