“Мэсыдж” швецкага праваабаронцы беларускай амбасадзе ў Стакгольме (фота)

Сёння кіраўнік швецкай праваабарончай арганізацыі Östgruppen Марцін Угла, якому амбасада Рэспублікі Беларусь у Стакгольме адмовіла ў візе, прыйшоў туды, каб забраць свой пашпарт. Перад сустрэчай з супрацоўнікамі амбасады Марцін Угла апрануў майку з выявай зняволенага беларускага праваабаронцы Алеся Бяляцкага і надпісам “Свабоду Алесю Бяляцкаму”.

- Амбасада знаходзіцца на чацвёрцам паверсе вялікага дома, і я выпадкова  трапіў у ліфт разам з самім амбасадарам, спадаром Андрэем Грынкевічем. Калі ён пабачыў маю майку, адразу адвярнуўся ад мяне і пачаў глядець у сцяну. Я сказаў яму “добры дзень”, але амбасадар нічога не адказаў на гэта, -- распавёў Марцін Угла. -- Пасля таго, як аддалі мой пашпарт, я сабраўся з’ехаць, але пабачыў, што паштовая скрынка амбасады, якая знайходзіцца на вуліцы, пакрыта слоем пылу. Гэта падштурхнула мяне зрабіць на ёй надпіс: “Свабоду Бяляцкаму”!  Канешне, сумна, што мне адмовілі ў візе, але тым не менш без усялякага сумневу можна канстатаваць, што мой мэсыдж дайшоў да прадстаўнікоў беларускіх уладаў у Швецыі, -- гаворыць Марцін Угла.