Марыну Коктыш знялі з цягніка Вільня-Мінск
Гэта ўжо другі выпадак затрымання журналістаў на літоўска-беларускай мяжы за апошнія два дні.
Пра затрыманне Марыны на беларускай мяжы (станцыя Гудагай) паведамілі БАЖ калегі, якія тым жа цягніком вярталіся ў Мінск з канферэнцыі.
На мытным кантролі яе даглядзелі, абшукалі і пасадзілі на начны цягнік Масква-Калінінград. Квіток давялося купляць за свае грошы, - распавяла пазней журналістка калегам з «Народнай волі». Прычыну такіх дзеянняў ёй ніхто не патлумачыў. Ніякіх носьбітаў інфармацыі журналістка з сабой не брала, таму вымаць у яе не было чаго.
25 мая аналагічны інцыдэнт здарыўся з журналісткай Наталляй Верашчагінай, якая разам з лідарам незалежнага прафсаюзу РЭП Генадзем Фядынічам і актывістам Ірагам Комлікам таксама вярталася з Вільні. Журналістку накіравалі на асабісты дагляд, падчас якога забралі ў яе грошы, ноўтбук і флэшку.
