Праваахоўнікі правяраюць Белсат?
Тэлеканал «Белсат» мае інфармацыю, паводле якой у дачыненні да яго міліцыя праводзіць праверку.
Каментуючы гэтую інфармацыю, якую падае сайт незалежнага тэлеканала, прадстаўнік «Белсата» ў Беларусі Міхась Янчук падкрэслівае, што гэта пакуль звесткі з неафіцыйных крыніц:
– У нас ёсць звесткі толькі з неафіцыйных крыніцаў міліцэйскіх, што міліцыі замовілі такую праверку правесці, а з чым яна звязаная, мне вельмі цяжка сказаць, таму што нас ў краіне магчыма ўсё. Увосень нас чакаюць парламенцкія выбары і мы ведаем, што ў нас пад выбары заўсёды адбываецца. Можа гэта зачыстка, альбо спроба трошкі нас прыцішыць перад выбарамі. А можа гэта сапраўды звязана з тым фактам, што мы збіраліся гэтым летам падаваць дакументы на чарговую акрэдытацыю.
Тэлеканал «Белсат» ужо двойчы падаваў дакументы на акрэдытацыю, але кожны раз атрымліваў адмову.
Спадарожнікавае тэлебачанне “Белсат” – гэта першы незалежны тэлеканал, які вяшчае на Беларусь з 10 снежня 2007 года. На тэрыторыі Беларусі канал не мае афіцыйнага статусу, і ягоная праца абапіраецца на фрылансераў.
