У Гародні нават дрэвы сталі палітыкай

Старшыня Гарадзенскага аблвыканкаму Сямён Шапіра ў прамой лініі з насельніцтвам Гарадзенскай вобласці на мясцовым канале тэлебачання заявіў, што “грамадскія слуханні па вырубцы дрэў, з-за таго, што іх ператвараюць у незразумелае палітычнае супрацьстаянне, вырашана больш не праводзіць”. 

Змаганне гарадзенскіх актывістаў супраць вырубкі старых дрэў у горадзе мае даўнішні і нават зацяжны характар. Для нейтралізацыі пратэстаў улады гораду падключылі ўвесь адміністратыўны рэсурс і сілавыя ведамствы. Таму, збольшага, пратэсты актывістаў сканчаліся затрыманнямі, судамі, і, як вынік – карамі.

Тым не менш, супрацьстаянне заставалася, але на пэўным этапе пачало набываць, з боку ўладаў, злёгку цывілізаваны характар - было аб’яўлена, што па пытанні вырубкі дрэваў будуць праводзіцца грамадскія слуханні.

Аднак, ужо на першых такіх слуханнях, праціўнікі вырубкі дрэў абвінавацілі гарадзенскія ўлады ў прымусовым набіранні тых людзей, якія прагаласуюць за лінію ўлады.

Зараз жа старшыня Гарадзенскага аблвыканкама паставіў крыж нават на фармальных і паказных праявах дэмакратыі, абвесціўшы дыскусію па гэтым пытанні “незразумелым палітычным супрацьстаяннем”.