Брэсцкія анархісты абвяргаюць УУС
Брэсцкія анархісты абвяргаюць паведамленне прэс-службы Брэсцкага ўпраўлення ўнутраных спраў пра міжнародны сход анархістаў.
На сайце УУС сказана, што “на мерапрыемстве прысутнічала больш за 150 асобаў, у тым ліку прадстаўнікоў розных рэгіёнаў Беларусі, а таксама Украіны і Польшчы. Яны абмяркоўвалі планы сумеснай арганізацыі скаардынаваных дзеянняў экстрэмісцкага характару, накіраваных на парушэнне грамадскага парадку і бяспекі. Выказваліся лозунгі ў падтрымку анархістаў, затрыманых у г. Мінску і асуджаных за закідванне бутэлькамі з запальваючай сумессю амбасады Расейскай Федэрацыі ў Рэспубліцы Беларусь. Акрамя таго, на прыкладзе апошніх падзеяў у Польшчы, калі анархісты правялі шэсце па цэнтральных вуліцах Варшавы, прапаноўвалася скаардынаваць дзеянні па міжнароднай супрацы з выездам на месцы правядзення акцыяў.”
Па словах аднаго з анархістаў, названае мерапрыемства -- гэта быў звычайны канцэрт, на якім прысутнічалі і панкі, і субкультуршчыкі, і АНТІФА. На шчасце, некаторыя маладзёны раней сышлі дадому і ўбачылі кардоны міліцыі і аўтазакі, якія рухаліся да месца канцэрта. Яны папярэдзілі сваіх сябраў. Хлопцы разбегліся.
Каго менавіта затрымалі, ён не ведае. Апаратуру не забралі, і пасля таго, як міліцыянты з’ехалі, канцэрт доўжыўся да раніцы.
На сайце анархістаў паведамляецца, што 11 удзельнікаў канцэрту былі затрыманы, праз 3 гадзіны іх адпусцілі, перапісаўшы дадзеныя. Не абыйшлося без пагроз з боку супрацоўніка КДБ Дзяніса Сямёнава. Ён пагражаў пасадзіць, звольніць з працы і вучобы.
