У Брэсце запланаваны пікеты, прысвечаныя праблемам даступнага жылля

З ініцытятывай правядзення трох такіх акцый у сакавіку выступілі мясцовыя актывісты Беларускай партыі левых “Справядлівы свет”,  якія ўжо перадалі адпаведныя заяўкі ў Брэсцкі гарвыканкам.

Як зазначыла старшыня гарадской арганізацыі гэтай партыі Людміла Дзенісенка, мэта пікетавання – распавесці грамадскасці пра тое, што ў Беларусі парушаецца артыкул 48 Канстытуцыі, які гарантуе даступнасці жылля для грамадзян.

“Ільготнае крэдытаванне будаўніцтва жылля ў нашай краіне скарачаецца, - кажа Людміла Дзенісенка. - Пры гэтым прыбыткі ў большасці людзей такія, што яны не могуць пабудаваць жыллё без такога крэдыту”. У выніку высокія кошты на будаўніцтва і буйныя адсоткі за карыстанне банкаўскім крэдытам фактычна пазбаўляюць грамадзян магчымасці набыць жыллё па даступных цэнах. Па словах партыйнанай актывісткі, “улада павінна ведаць, што гэта хвалюе многіх грамадзян, асабліва маладыя сем'і”.