Суд над лідарам аргкамітэта па стварэньні нацыянал-бальшавіцкай партыі Яўгенам Контушам зноў перанесены

Сёньня суддзя суду Першамайскага раёна сталіцы Юрый Гарбатоўскі працягнуў разгляд адміністратыўнай справы Яўгена Контуша. Актывіста вінавацяць у дробным хуліганстве, якое выяўляецца ў тым, што нібыта ён раніцай 3 сьнежня ад імя беларускіх нацыянал-бальшавікоў выплюхнуў ля ўваходу ў Белтэлерадыёкампанію вядро варанай локшыны і раскідаў улёткі.

Суддзя прагледзеў два відэазапісы, якія былі прадстаўленыя супрацоўнікамі міліцыі. Аднак паказаньні сьведкаў супярэчылі ўбачанаму на гэтых кадрах. І таму было прынятае рашэньне выклікаць новых сьведкаў са штату ахоўнікаў Белтэлерадыёкампаніі. Наступнае судовае паседжаньне адбудзецца 9 сьнежня ў 12-20.