Судзьдзя Заводзкага раённага суду Менску Алег Зямцоў не задаволіў скаргу адвакатаў Аляксандра Казуліна
Па інфармацыі Радыё "Свабода", абаронцы былога кандыдата на прэзыдэнта дамагаліся адмены пастановы пракуратуры, якая не завяла крымінальную справу на супрацоўнікаў "Алмазу", якія арыштоўвалі й канваявалі Аляксандра Казуліна 25 сакавіка. Паводле адвакатаў, алмазаўцы абражалі Казуліна й нанесьлі яму траўмы рук кайданкамі".
Гэта ўжо другая спроба абаронцаў Аляксандра Казуліна аспрэчыць рашэньні пракуратуры адносна дзеяньняў міліцыянтаў супраць былога кандыдата на прэзідэнта. Першая скарга, у суд Маскоўскага раёну Менску, таксама была адхіленая. Цяпер адвакаты Казуліна зьбіраюцца зьвярнуцца са скаргамі на пракуратуру ў Менскі гарсуд.
Таксама рыхтуецца скарга на прысуд, які быў вынесены Аляксандру Казуліну 13 ліпеня. Палітыка асудзілі на пяць з паловай гадоў зьняволеньня. Чакаецца, што сёньня, 18 ліпеня, з Аляксандрам Казуліным у сьледчым ізалятары сустрэнецца ягоны адвакат Ігар Рынкевіч.
