У Барысаве міліцыя часова “нейтралізавала” мясцовых актывістаў
Аляксандр Малчанаў
Барысаўскіх актывістаў, якіх абвінавачваюць у абразе дзяржаўных сімвалаў паводле артыкула 370 Крымінальнага кодэкса РБ, Аляксандра Малчанава, Андрэя Мікалаеўскага, а таксама сведку па гэтай справе Валянціна Палітыка 15 лістапада позвамі выклікалі ў мясцовы РАУС. Пад час трохгадзіннай гутаркі з кіраўніком следчай групы Альшэўскім высьветлілася, што асаблівай нагоды, акрамя прафілактычнай, для выкліку у следчых не было. Альшэўскі азнаёміў іх з пастановаю аб прызначэньні экспертызы ў межах крымінальнай справы. Малчанаву вярнулі частку матэрыялаў, сканфіскаваных пад час нядаўніх ператрусаў. Але, тым не меней, пашпарт Малчанаву так і не вярнулі.
Варта нагадаць, што сёньня у Барысаве Прэзідэнт Беларусі Аляксандр Лукашэнка наведвае аб’екты прамысловасці і таму ўсе “недабранадзейныя” асобы ўзятыя пад пільны кантроль спецслужбаў і праваахоўнікаў.
Малчанаў і ягоныя сябры патрапілі пад пераслед міліцыі пасьля таго, як 26 кастрычніка ў цэнтры Барысава былі залітыя фарбай дзяржаўныя сцягі. У доме Аляксандра Малчанава апошнім часам адбылося некалькі ператрусаў, падчас якіх супрацоўнікі міліцыі шукалі забароненую нацыянальную сімволіку і канфіскавалі кампутар. Сам Аляксандр быў затрыманы і пакараны адміністратыўным арыштам нібыта за непадпарадкаваньне.
