Прысуды за Плошчу. МІКОЛУ СТАТКЕВІЧУ -- 6 ГАДОЎ. ДЗМІТРЫЮ УСУ -- 5,5. АЛЯКСАНДРУ КЛАСКОЎСКАМУ - 5 ГАДОЎ ЗНЯВОЛЕННЯ
Дзмітрыю Буланаву - 3 гады, Аляксандру Квяткевічу - 3,5, Арцёму Грыбкову - 4 гады калоніі. Андрэю Пазняку - 2 гады "хіміі" без накіравання ў папраўчыя ўстановы.
Прысуды двум экс-кандыдатам у прэзідэнты і яшчэ пяці ўдзельнікам Плошчы-2010 абвешчаныя ў Ленінскім судзе Мінска суддзёй Людмілай Грачовай.
Дзмітрый Ус узяты пад варту ў зале суда. Андрэя Пазняка, наадварот, выпускаюць.
Нагадаем, што пракурор Кірыл Чубкавец запрасіў для ўсіх сямёх вялікія тэрміны зняволення:
Міколе Статкевічу -- 8 гадоў, Дзмітрыю Усу -- 7 гадоў, Аляксандру Класкоўскаму -- 8,5 гадоў, Андрэю Пазняку, Дзмітрыю Буланаву, Аляксандру Квяткевічу, Арцёму Грыбкову -- па 4 гады. Усім, згодна з "цяжкім" артыкулам абвінавачвання, якой ёсьць артыкул "масавыя беспарадкі", "свеціць" узмоцнены рэжым утрымання ў калоніі.
Акрамя таго, Арцёма Грыбкова, па версіі пракурора, патрэбна прымусова лячыць ад алкагольнай залежнасці. Факт залежнасці не даказаны.
20 траўня прысуд быў адкладзены з-за хваробы суддзі.
Сёння ў залі суда прысутнічаюць амбасадары дэмакратычных краін, у тым ліку ЗША, Швецыі, Германіі. Падтрымаць палітвязняў прыйшоў таксама ўмоўна асуджаны экс-кандыдат у прэзідэнты Уладзімір Някляеў.
