Афіцыйны Мінск — супраць удзелу апазіцыі ў Еўранэст

Беларусь будзе настойваць на тым, каб у парламенцкай асамблеі "Ўсходняга партнёрства" Еўранэст удзельнічала толькі афіцыйная дэлегацыя. Пра гэта агенцтву БЕЛТА заявіў старшыня Пастаянай камісіі Палаты прадстаўнікоў па міжнародных справах і сувязях з СНД Сяргей Маскевіч.

"Нас цікавіць толькі раўнапраўны ўдзел у Еўранэст. Будзем настойваць, каб беларуская дэлегацыя цалкам фармавалася з прадстаўнікоў Нацыянальнага сходу і яе колькасны склад быў аднолькавым з дэлегацыямі астатніх усходнееўрапейскіх краін", — сказаў дэпутат. Ён падкрэсліў, што беларускія парламентары гатовыя актыўна працаваць у Еўранэст, але толькі ў якасці афіцыйных чальцоў асамблеі, а не назіральнікаў.

Нагадаем, што прадстаўнікі Еўрапарламента выступілі з прапановай, каб у Еўранэст увайшлі ў якасці назіральнікаў па 5 прадстаўнікоў ад улады і апазіцыі. Калі ж афіцыйны Мінск не пагодзіцца на такія ўмовы, беларускую дэлегацыю могуць цалкам скласці толькі прадстаўнікі апазіцыі.