«Белсату» зноў не хапае для рэгістрацыі аднаго дакумента
Міністэрства замежных спраў Беларусі зноў не можа зарэгістраваць у краіне прадстаўніцтва спадарожнікавага тэлеканала «Белсат», спасылаючыся на адсутнасць аднаго дакумента.
Пра гэта паведаміла сёння прэс-службе БАЖ дырэктарка тэлеканала Агнешка Рамашэўская.
Па яе словах, «Белсат» паўторна звярнуўся ў МЗС па рэгістрацыю каля месяца таму.
«Дакументы былі прынятыя, і яшчэ тыдзень таму нам казалі, што іх разглядаюць і што ўсё добра, — распавяла спн. Рамашэўская. — А напрыканцы мінулага тыдня мне прыйшоў ліст з МЗС, што яны не знайшлі „Палажэння аб карэспандэнцкім пункце“, хоць яно было ў тым пакеце дакументаў. Але мы можам паслаць яго яшчэ раз, калі там нешта згубілася».
Упершыню «Белсат» падаў у МЗС дакументы на рэгістрацыю прадстаўніцтва тэлеканала як часткі Польскага тэлебачання (TVP) у Беларусі 20 снежня 2008 года.
У лютым Міністэрства замежных спраў прыпыніла іх разгляд, спаслаўшыся на тое, што яны аформленыя неналежным чынам. «Разгляд пытання пра адкрыццё ў Рэспубліцы Беларусь карэспандэнцкага пункта тэлеканала „Белсат“ можа быць адноўлена пасля выпраўлення пералічаных заўваг», — гаварылася ў пасланні за подпісам намесніка міністра Валерыя Варанецкага ад 16 лютага.
«Пакуль мы бачым адно — працэс зацягваецца. Але гэта можна было прадбачыць», — зазначыла Агнешка Рамашэўская, каментуючы паўторнае паступленне заўваг ад МЗС.
Нагадаем, што тэма рэгістрацыі «Белсата» Міністэрствам замежных спраў некалькі разоў згадвалася ў апошняй рэзалюцыі па Беларусі, прынятай Парламенцкай Асамблеяй Рады Еўропы 23 чэрвеня. У прыватнасці, гэта фігуруе як адно з патрабаванняў па забяспячэнні свабоды друку і інфармацыйнага плюралізму.
«Я магу толькі спадзявацца, што гэта паўплывае на рашэнне МЗС, але што будзе насамрэч — немагчыма прадказаць», — зазначыла ў гутарцы з прэс-службай БАЖ Агнешка Рамашэўская.
