Мікалая Аўтуховіча яшчэ на месяц пакінулі на Валадарцы
Мікалай Аўтуховіч
Расьсьледаваньне справы Мікалая Аўтуховіча, Юрыя Лявонава і Ўладзімера Асіпенкі працягнутае да 3 ліпеня. Пра гэта паведаміў адвакат Павал Сапелка, які бачыўся з Мікалаем Аўтуховічам ў менскім сьледчым ізалятары на Валадарскага:
“Ён сказаў, што яму не зьмянілі меру стрыманьня і таму ён працягвае галадоўку пратэсту. Аўтуховіч выглядае вельмі стомленым, ён згубіў болей за 25 кіляграмаў вагі й кожны тыдзень працягвае страчваць па 2-3 кіляграмы. Кропельніцу цяпер яму ня ставяць, але працягваюць трымаць у мэдычнай частцы ізалятару”.
Адвакат сказаў, што зьбіраецца абскарджваць рашэньне, паводле якога ягонаму падабароннаму не зьмянілі меру стрыманьня.
Прадпрымальнік з Ваўкавыску Мікалай Аўтуховіч пад арыштам з 8 лютага, а галадоўку пратэсту трымае з 16 траўня.
