«Белпошта» зноў адмовіла ў распаўсюдзе «Газеце Слонімскай» і «Отдушине»
Новы генеральны дырэктар РУП «Белпошта» Юрый Комар, які заступіў на гэтую пасаду на мінулым тыдні, адмовіў у распаўсюдзе праз падпіску недзяржаўным рэгіянальным выданням «Газета Слонімская» і «Отдушина».
«РУП “Белпошта” лічыць немэтазгодным уключэнне ў падпісны каталог выданняў “Газета Слонімская” і “Отдушина”», — адказаў новапрызначаны гендырэктар паштовага прадпрыемства на просьбу галоўнага рэдактара Віктара Валадашчука ўключыць газеты ў падпісны каталог на 2-е паўгоддзе 2009 года.
Па змесце ліст амаль нічым не адрозніваецца ад папярэдніх адказаў «Белпошты» на звароты недзяржаўных выданняў уключыць іх у падпісны каталог. «…Выбар друкаваных выданняў для фарміравання каталога з мэтай наступнага іх распаўсюду праз падпіску з’яўляецца правам РУП “Белпошта”, якое рэалізуецца ім у адпаведнасці з заканадаўствам… Вашыя патрабаванні не грунтуюцца на нормах заканадаўства», — даводзіць чарговы кіраўнік паштовага прадпрыемства-манапаліста.
