Арцёму Дубскаму афіцыйна прад’яўлена абвінавачанне
Фота \"Радыё Свабода\"
Актывісту зарэгістраванай у Чэхіі грамадскай арганізацыі "Малады Фронт" Арцёму Дубскаму афіцыйна прад’яўлена абвінавачанне ў парушэнні артыкулу 415 Крымінальнага кодэкса (ухіленне ад адбыцця пакарання ў выглядзе абмежавання волі).
Мера стрымання ў дачыненні А. Дубскага пакінута ранейшай – утрыманне пад вартай. У найбліжэйшы час яго павінны перавесці са следчага ізалятара ў Асіповічах, у следчы ізалятар у Бабруйску.
Нагадаем, 3 сакавіка Асіповіцкі гарадскі суд спыніў крымінальную справу ў дачыненні да А. Дубскага па абвінавачанні яго ў прычыненні маёмаснай шкоды з прычыны прымірэння бакоў. Адразу па сканчэнні судовага працэсу Дубскага даставілі ў Асіповіцкі РУУС для афармлення дакументаў па другой справе.
Арцём Дубскі – адзін з фігурантаў «справы 14-ці». Ён быў асуджаны на два гады абмежавання волі за ўдзел у акцыі прадпрымальнікаў у студзені 2008 году. У тым жа годзе ў дачыненні да А. Дубскага была заведзена яшчэ адна справа паволле арт. 415.
Пакаранне па ёй – ад паўгоду да трох гадоў пазбаўлення волі.
Малады чалавек быў зняты з цягніка 13 лютага ў Гомелі. Апошнія некалькі месяцаў Дубскі жыў ва Украіне. У кастрычніку 2008 г. ён папрасіў там палітычнага прытулку, але потым адклікаў заяву.
