На Асамблею НДА — з дазволу КДБ
Асамблея няўрадавых арганізацыяў і ініцыятываў адбудзецца 6-7 сакавіка ў Менску. Да ўдзелу ў ёй арганізатары разаслалі запрашэньні ў больш за 300 арганізацыяў. Пра гэта яны паведамілі сёньня на спэцыяльнай прэсавай канфэрэнцыі.
Сяргей Мацкевіч з цэнтру “Супольнасьць” патлумачыў, чаму насьпеў час праводзіць форум няўрадавых арганізацыяў. Папярэдні адбыўся яшчэ ў 2004 годзе. За гэты час шмат што зьмянілася:
“У крымінальным заканадаўстве зьявілася адказнасьць за дзейнасьць ад імя незарэгістраванай арганізацыі. Грамадзкія арганізацыі пазбавілі льготаў. Перасьлед актывістаў — гэта наш сталы клопат. Але апошнім часам у краіне нібыта назіраецца так званая лібэралізацыя. І таму гэты час вельмі зручны, каб грамадзкім арганізацыям сабрацца разам і супольна абмеркаваць свае праблемы, паспрабаваць вызначыць сваю супольную пазыцыю”.
Менскаму форуму ўжо папярэднічалі рэгіянальныя мерапрыемствы, распавёў Віталь Васількоў — прадстаўнік грамадзкага цэнтру “Кола” з Магілёва:
“Напрыклад, у нашай Магілёўскай вобласьці адбыўся нават вялікі фэст — больш за 100 арганізацыяў у ім удзельнічалі. Акрамя таго, адбыліся і тэматычныя круглыя сталы. Гэта — эколягі, моладзевыя арганізацыі ды іншыя. Зьявіўся нават такі новы кірунак, як новыя мэдыі. Гэта яшчэ адна тэма ў дзейнасьці няўрадавых арганізацыяў”.
Пасьля спадар Васількоў удакладніў: у праграме менскага форуму заплянаваная сустрэча прадстаўнікоў “новых мэдыяў” — людзей, якія займаюцца рознымі інтэрнэт-праектамі ў рэгіёнах.
На Асамблею запрасілі больш за 50 прадстаўнікоў замежных арганізацыяў, якія доўгі час працавалі зь беларускімі калегамі, паведаміў Сяргей Мацкевіч:
“На сёньняшні дзень двое зь іх ужо не атрымалі візы ў Беларусь. Гэта прадстаўнік кіеўскага аддзяленьня Нацыянальна-дэмакратычнага інстытуту Дэвід Гамільтан і прадстаўніца фундацыі Баторыя з Варшавы Агнешка Камароўска.
Мне патэлефанавалі з амбасады Беларусі ў Кіеве і сказалі, што вы запрашаеце на Асамблею Дэвіда Гамільтана.Але мы ня можам даць яму візу, паколькі ён у сьпісе неўязных у Беларусь. Але калі вы вельмі хочаце, зьвярніцеся ў КДБ. Можа, яны дадуць такі дазвол”.
Ёсьць яшчэ чалавек 5, якія дагэтуль не атрымалі візы. І, можа, гэты сьпіс будзе, на жаль, павялічаны”.
Сярод запрошаных на Асамблею — Беларускі Хэльсынскі камітэт, рух “За свабоду”, праваабарончы цэнтар “Вясна”, які зноў падаў дакумэнты на рэгістрацыю, ды іншыя.
