Старшыню Рады моладзі БНФ Алеся Каліту хочуць справадзіць у войска

Старшыню Рады моладзі БНФ Алеся Каліту хочуць справадзіць у войска

Выклікаць у ваенкаматы пачалі нават тых, каму раней дактары паставілі дыягназ “да службы ў войску нягодны”. Сярод іх – старшыня Рады моладзі БНФ Алесь Каліта. Тры месяцы таму на мэдыцынскай камісіі ў райваенкамаце ў яго знайшлі анэўрызму сэрца. Аднак у панядзелак Каліту зноў выклікалі ў ваенкамат і накіравалі на чарговае, цяпер ужо на абласное абсьледаваньне.

- Пасьля таго, як абласныя дактары сказалі, што для іх дастаткова дадзеных пра тое, што я маю анэўрызму, на іх пачалі ціснуць вайсковыя чыноўнікі. І яны былі вымушаныя даць накіраваньне ў абласную больніцу.

Адной нагой на ганку казармы стаіць і сябра моладзі БНФ Франак Вячорка. Тэлефонны званок журналіста Рацыі засьпеў маладзёна ў шпіталі, дзе ён праходзіць абсьледаваньне па накіраваньні вайсковай мэдыцынскай камісіі. Франак упэўнены, што ўлады яшчэ доўгі час будуць выкарыстоўваць новы мэханізм ізаляцыі палітычна актыўнай моладзі ў вайсковых частках.

- Нашае выйсьце – у моцных добрых акцыях салідарнасьці, а таксама ў змаганьні за справядлівасьць. Трэба дабівацца выкананьня сваіх правоў.

Паводле Радыё Рацыя