Як жа дабiцца справядлiвага суда?
Група жанчын прапанавала Аляксандру Лукашэнку iнiцыяваць стварэнне спецыяльнай парламенцкай камiсii па пераглядзе крымiнальных i грамадзянскiх спраў.
Лiст з такой прапановай на iмя прэзiдэнта падпiсалi 34 жанчыны з розных рэгiёнаў краiны — сваячкi асуджаных, а таксама нязгодныя з рашэннямi судоў па сваiх грамадзянскiх справах.
У лiсце, у прыватнасцi, адзначаецца, што "чыноўнiкi ад правасуддзя", якiя дапусцiлi па справах заяўнiкаў i iх сваякоў "найгрубейшыя парушэннi закона, непрафесiяналiзм, што даходзiць да халатнасцi", не маюць намеру добраахвотна прызнаваць свае памылкi i пераглядаць вышэйназваныя справы.
Сярод падпiсантаў — жыхарка Мiнска Галiна Юбко, у якой 7 кастрычнiка 2004 года ў бацькоўскiм доме ў вёсцы Захараўка Крупскага раёна Мiнскай вобласцi была забiта i спалена родная сястра. Тры гады Г.Юбко дабiваецца аб'ектыўнага расследавання гэтага злачынства.
Аўтары лiста выказваюць упэўненасць, што стварэнне ў Беларусi па прыкладзе Вялiкабрытанii спецыяльнай парламенцкай камiсii дапаможа вырашыць у грамадстве шэраг "набалелых праблем". Сярод iх — забеспячэнне эфектыўнасцi разгляду спраў у судах, прыцягненне пасрэднiкаў у асобе прадстаўнiкоў грамадскасцi для больш хуткага i поўнага даследавання спраў, а таксама адраджэнне ў грамадстве веры ў справядлiвасць сiстэмы правасуддзя.
Падпiсанты лiста заяўляюць аб гатоўнасцi пачаць кампанiю па зборы подпiсаў у падтрымку сваёй iнiцыятывы.
У iнтэрв'ю БелаПАН юрыст Тамара Сяргей выказала меркаванне, што з'яўленне гэтай групы жанчын з'яўляецца сведчаннем крызiсу судовай сiстэмы краiны. Паводле яе слоў, з органа, якi вырашае канфлiкты на падставе закона, беларускi суд ператварыўся ў структуру, якая стварае напружанасць у грамадстве.
"На свае абгрунтаваныя скаргi грамадзяне атрымлiваюць ад чыноўнiкаў суда i пракуратуры толькi фармальныя адпiскi, што з'яўляецца парушэннем артыкула 40 Канстытуцыi Рэспублiкi Беларусь i артыкула 14 Мiжнароднага пакта аб грамадзянскiх i палiтычных правах", — зазначыла Т.Сяргей. Паводле яе iнфармацыi, адзін з аўтараў лiста мiнчанка Людмiла Кучура вымушана была звярнуцца са скаргай у Камiтэт па правах чалавека ААН.
