Вінцук Вячорка быў затрыманы па дарозе на сход Партыі БНФ Гарадзенскага рэгіёну
4 лістапада, Горадня. Старшыня Партыі БНФ Вінцук Вячорка накіроўваўся ў Горадню, дзе сёньня меў адбыцца сход арганізацыяў Партыі БНФ Гарадзенскага рэгіёну. Па дарозе на сход аўтамабіль, у якім знаходзіўся Вінцук Вячорка, быў беспадстаўна затрыманы і адканваяваны ў Гарадзенскі гарадзкі аддзел ДАІ. Прычыну затрыманьня супрацоўнікі ДАІ пазьней патлумачылі нейкім "загадам".
Вінцук Вячорка здолеў пакінуць аўтамабіль і трапіць на сход. Празь пэўны час машыну таксама адпусьцілі.
"Структуры Партыі БНФ у Гарадзенскай вобласьці - адны з найбольш "жывых", - кажа Вінцук Вячорка. - Мы правялі справаздачны сход, падчас якога былі таксама вылучаныя 10 дэлегатаў на Зьезд Партыі БНФ. Паслухаўшы справаздачу кіраўніка гарадзкой арганізацыі Вадзіма Саранчукова, яшчэ раз пераконваюся: найлепшыя акцыі гарадзенцаў - незалежніцкія, зьвязаныя з нацыянальна-дэмакратычнымі каштоўнасьцямі. БНФ і надалей трэба рабіць на гэта стаўку".
На сходзе ад пачатку да канца прысутнічаў прадстаўнік упраўленьня юстыцыі. За будынкам увесь час наглядалі міліцыянты з патрульнай машыны, а пад'езд да месца кантралявала машына ДАІ.
