Супрацоўнікі міліцыі затрымалі двух сяброў моладзевай арганізацыі “Задзіночаньне беларускіх студэнтаў” за распаўсюд улётак з заклікам да студэнтаў не ўдзельнічаць у датэрміновым галасаваньні

Сяржука Семянюка і Васіля Лепеша затрымалі 11 кастрычніка ў двары дома, дзе месьціцца офіс арганізацыі. Гэта быў міліцыянт, які нёс службу каля плоту Латвійскай амбасады. Ён выклікаў патрульную машыну. У хлопцаў у заплечніках знайшлі каля дзьвюх сотняў улётак, на якіх вялізнымі літарамі напісана: “Не заганяйся!”, а таксама заклік не ўдзельнічаць у датэрміновым галасаваньні. Міліцыянты патлумачылі юнакам, што не дапусьцяць, каб гэтыя ўлёткі трапілі па прызначэньні.

Хлопцаў даставілі ў раённае ўпраўленьне ўнутраных справаў Савецкага раёну. Іх абвінавачваюць у адміністрацыйным правапарушэньні (хутчэй за ўсё гэта будзе арт. 172.3 КаАП РБ – распаўсюд друкаваных выданьняў без выходных дадзеных).