У Магілёве судзяць мужчыну, якога затрымалі за тое, што збіраўся "ўсталяваць схаваную камеру на выбарчым участку"
У судзе Магілёўскай вобласці 30 верасня распачаўся суд над раней асуджаным за каментары жыхаром Кіраўска Юрыем Аверкавым. Летам яго судзілі за "абразу прадстаўніка ўлады" (арт. 369 КК), а цяпер мужчыну абвінавачваюць у "навучанні ці іншай падрыхтоўцы асоб для ўдзелу ў масавых беспарадках" (ч. 3 арт. 293 КК) і "распальванні іншай сацыяльнай варожасці" (ч. 1 арт. 130 КК). Працэс у закрытым рэжыме вядзе Ірына Ланчава.
- Юрый Аверкаў. Скрыншот з прапагандысцкага сюжэта
Юрыя Аверкава затрымалі напярэдадні "Адзінага дня галасавання" ў лютым 2024 года. Прапагандысты тады паведамілі, што Аверкаў нібыта з'яўляецца адміністратарам кіраўскага тэлеграм-канала, які ён стварыў у 2020 годзе, дзе "заклікаў людзей выходзіць на вуліцы". Праўладны тэлеграм-канал апублікаваў відэа з затрыманым жыхаром Кіраўска, якога абвінавачваюць у сувязі з ініцыятывай "кааліцыяй пратэсных двароў".
У сюжэце казалі, што імя затрыманага — Юрый Аверкаў. Ён з'яўляецца адміністратарам "дэструктыўнага тэлеграм-канала" Кіраўска. У роліку закадравы голас паведамляе, што мужчына ў канале заклікаў людзей выходзіць на вуліцы і "парушаць грамадскі парадак". Таксама Аверкаў нібыта прайшоў рэгістрацыю ў чат-боце плана "Перамога" і нібыта збіраўся "ўсталяваць схаваную камеру на выбарчым участку", каб зафіксаваць парушэнні падліку галасоў. У прапагандысцкім сюжэце заяўлялі, што ў снежні 2023 года мужчына "зноў зазнаў уплыў дэструктыўных каналаў, у якіх заклікалі ісці на выбарчыя ўчасткі, запомніць аднаго з чальцоў камісіі і прасачыць за ім падчас вяртання дадому".
11 чэрвеня Аверкава судзілі за "абразу прадстаўніка ўлады" (арт. 369 КК). Справу разглядаў старшыня Кіраўскага раённага суда Антон Дудаль. Вынік судовага пасяджэння пакуль невядомы.
