Супрацоўніка райвыканкаму будуць судзіць па справе "Кадравага рэзерву для новай Беларусі"
У Віцебскім абласным судзе 28 жніўня распачнецца суд над 34-гадовым інспектарам сектара спорту і турызму Верхнядзвінскага райвыканкаму Аляксеем Кісялёвым. Па справе ініцыятывы "Кадравы рэзерв для новай Беларусі" яго абвінавачваюць паводле ч. 1 арт. 361-4 (садзейнічанне экстрэмісцкай дзейнасці) і арт. 361-5 (Праходжанне навучання ці іншай падрыхтоўкі для ўдзелу ў экстрэмісцкай дзейнасці) Крымінальнага кодэкса. Адзначым, што гэта толькі другі суд у Беларусі паводле арт. 361-5 КК — гэты артыкул быў уведзены ў Крымінальны кодэкс Беларусі толькі ў 2021 годзе. Справу ў закрытым рэжыме будзе разглядаць Юрый Урбан.
- Аляксей Кісялёў. Фота з сацсетак
Нагадаем, 14 лютага 2024 года Следчы камітэт распачаў крымінальную справу супраць прадстаўнікоў і ўдзельнікаў ініцыятывы "Кадравы рэзерв для новай Беларусі", абвешчанай Аб'яднаным пераходным Кабінетам. Тады заявілі, што затрыманым інкрымінавана ч. 3 арт. 361-1 КК (стварэнне або ўдзел у экстрэмісцкім фармаванні), а да фігурантаў, якія знаходзяцца за межамі Беларусі, будзе прыменена працэдура спецыяльнай вытворчасці. Па тэлеканале АНТ пазней паказалі 14 людзей, нібыта затрыманых па гэтай справе.
Жыхара Верхнядзвінска Аляксея Кісялёва затрымалі 13 сакавіка 2024 года па справе "Кадравага рэзерву для новай Беларусі". З ім знялі і апублікавалі "пакаяльнае відэа". На камеру мужчыну казаў, што з'яўляецца "вучнем Кадравага рэзерву для новай Беларусі", і ў дачыненні да яго распачатая крымінальная справа.
Вядома, што Аляксей Кісялёў працаваў інспектарам сектара спорту і турызму райвыканкама.
Праграма "Кадравы рэзерв для новай Беларусі" была запушчана Аб'яднаным пераходным кабінетам у лістападзе 2022 года. Мэтай праекта была падрыхтоўка прафесіяналаў, якія змогуць працаваць на дзяржаўных пасадах і праводзіць рэформы.
