"Жыццё ў пенітэнцыярных установах грунтуецца на гвалце". Праваабаронца "Вясны" — на Стакгольмскай канферэнцыі па Беларусі
У шведскай сталіцы 21–22 траўня праходзіць Стакгольмская канферэнцыя па Беларусі. Яе арганізуе Інстытут замежнай палітыкі Швецыі з удзелам Ціханоўскай ды іншых прадстаўнікоў дэмакратычных сілаў Беларусі. У канфэрэнцыі ўдзельнічае вялікая колькасць беларускіх і замежных палітыкаў, аналітыкаў, журналістаў, дзеячаў культуры, актывістаў, праваабаронцаў, прадстаўнікоў НДА — каля 60 удзельнікаў толькі з беларускага боку. Сярод іх — праваабаронца "Вясны" Канстанцін Старадубец. Прыводзім вытрымку з яго выступу.
- Стакгольмская канферэнцыя па Беларусі 22 траўня
"Тэмай сёлетняга Дня салідарнасці з палітвязнямі ў Беларусі "Вясна" абрала права на здароўе і медыцынскую дапамогу ў няволі. Усе мы добра ведаем, чаму. Хвароба сэрца, прабадная язва, пнеўманія, спыненне сэрца, ішэмічная хвароба сэрца. Гэта афіцыйныя прычыны смерцяў у трагічных лёсах беларускіх палітвязняў. Мы па-ранейшаму не ведаем афіцыйнай прычыны смерці Вітольда Ашурака, чыё імя назаўжды звязанае з гэтым Днём, які мы ўсе адзначалі ўчора.
Хто наступны? Гэтае пытанне я часта задаю сабе. Я амаль упэўнены, што вы таксама.
Адна з прычын, чаму мы не можам перастаць думаць пра тое, хто стане наступнай ахвярай беларускага рэжыму, заключаецца ў тым, што сама сістэма месцаў несвабоды ў Беларусі створаная такім чынам, каб прычыніць максімум магчымых пакут. Штодзённае жыццё ў пенітэнцыярных установах краіны грунтуецца на жорсткім абыходжанні і гвалце".
Дзень салідарнасці з палітзняволенымі Беларусі: акцыі ў іх падтрымку праходзяць па ўсім свеце
