Берасцеец абразіў амапаўца: пракурор запрасіў год калоніі і 120 базавых штрафу
Міхаіл Літвак. Фота з сацыяльных сетак
Суд Брэсцкага раёна 8 і 9 жніўня разглядаў крымінальную справу, заведзеную на 35-гадовага Міхаіла Літвака. Мужчыну абвінавачвалі паводле арт. 369 КК у публічнай абразе прадстаўніка ўлады.
Суддзёй на працэсе выступаў Сяргей Маручак, дзяржабвінаваўца – памочнік пракурора раёна Аляксандр Таранько.
З 19 чэрвеня 2023 года Літвак знаходзіцца пад вартай, піша “Берасцейская вясна”.
Міхаіла абвінавачвалі ў тым, што 9 жніўня 2021 года ў тэлеграм-чаце “Рэальная Беларусь Чат” ён пакінуў паведамленне, якое прызналі публічнай абразай камандзіра ўзвода АМАПа Валянціна Пашкевіча, а менавіта выкарыстаў слова «дэбіл».
На судзе Пашкевіч, які абразіўся, прысутнічаў асабіста. Згадаў, што цяпер у Менску разглядаецца яшчэ адна крымінальная справа за каментар пра яго.
Пашкевіч запрасіў у суда дзве тысячы рублёў маральнай кампенсацыі з Літвака. Паколькі сам Літвак на судзе быў пад канвоем, за час суда гэтыя 2 тысячы паспелі перавесці блізкія Літвака. Пасля гэтага Пашкевіч ад пададзенага ў суд пазову адмовіўся, патлумачыўшы суддзі, што яму ўжо ўсё кампенсавалі.
Ужо пасля гэтага пракурор Таранько, нягледзячы на тое што ў Літвака ёсць двое непаўнагадовых дзяцей, прасіў суд пакараць мужчыну годам калоніі агульнага рэжыму са штрафам 120 базавых велічынь (4440 рублёў).
Прысуд Літваку абвясцілі 9 жніўня 2023, але рашэнне пакуль невядомае.
