"Свет не забыўся пра палітвязняў Беларусі". Як міжнародная супольнасць выказвае салідарнасць з нагоды Дня палітвязняў Дапоўнена
Праваабарончы цэнтр "Вясна" вызначыў 21 траўня Днём салідарнасці з палітзняволенымі Беларусі. У гэты дзень два гады таму ў шклоўскай калоніі №17 памёр палітвязень Вітольд Ашурак. Мерапрыемствы да Дня салідарнасці з палітзняволенымі Беларусі прайшлі ў розных краінах і гарадах. На падзею актыўна адрэагавала і міжнародная супольнасць. Прадстаўнікі розных краінаў свету працягваюць выказваць салідарнасць і патрабаваць вызвалення беларускіх палітвязняў.
21 траўня — Дзень палітвязняў у Беларусі. Далучайся да акцый салідарнасці!
Вясна" заклікае 21 траўня выказаць салідарнасць з усімі палітвязнямі.
Дзяржсакратар ЗША Энтані Блінкен заклікаў вызваліць усіх беларускіх палітвязняў
«Напярэдадні Дня салідарнасці з палітвязнямі ў Беларусі мы асуджаем затрыманне больш за 1500 зняволеных, якія ўтрымліваюцца рэжымам Лукашэнкі. Мы заклікаем да іх неадкладнага і безумоўнага вызвалення і падтрымліваем імкненне беларускага народа да дэмакратычнай будучыні», — напісаў Блінкен.
Міністр замежных спраў Эстоніі Маркус Цcахкна напісаў адкрыты ліст Віктару Бабарыку
«Выстаўляючы сваю кандыдатуру на пасаду прэзідэнта, вы ўсведамлялі рызыкі, але ўсё роўна пайшлі на іх. Вы хацелі для сваёй краіны палітычнага плюралізму, які з'яўляецца перадумовай для дэмакратыі, правоў чалавека і асноўных свабод. Вы былі і застаяцеся натхняльнікам для беларусаў, якія жадаюць свабодных выбараў, але замест гэтага атрымліваюць крывавыя рэпрэсіі.
Хачу вас запэўніць — свет не забыўся пра палітвязняў Беларусі. Мы глыбока занепакоеныя вашым здароўем і дабрабытам, зычым усім вам, хто церпіць жорсткія катаванні ў руках баязлівага рэжыму, сілы і душэўнага спакою.
Перакананы, што неўзабаве дэмакратыя пераможа і героі пойдуць на волю будаваць Беларусь у эўрапейскай сям’і. Мы з вамі!».
Амбасадар Польшчы ў Беларусі Артур Міхальскі падтрымаў беларускіх палітвязняў
«У Беларусі больш за 1500 палітвязняў. Іх трымаюць у невыносных умовах, яны страчваюць здароўе і нават жыццё, пра многіх з іх даўно няма ніякіх звестак. Вязні сумлення павінны быць неадкладна вызвалены, без усялякіх умоў, і поўнасцю рэабілітаваны», — напісаў ён у Twitter.
Таксама з заклікам вызваліць беларускіх палітвязняў выступіў і МЗС Польшчы.
- У Беларусі болей за 1500 палітвязняў.Сёння, ў Дзень палітвязняў, мы зноў заклікаем улады ў Мінску вызваліць усіх зняволеных, у тым ліку, Андрэя Пачобута, і спыніць далейшыя рэпрэсіі.
МЗС Літвы падтрымала беларускіх палітвязняў
«У спісе палітвязняў у Беларусі больш за 1500 імёнаў. Кожная з іх гісторый з'яўляецца сведчаннем рэпрэсій з боку беларускага рэжыму, якія працягваюцца.
У гэты Дзень палітвязняў у Беларусі мы кажам усім, хто несправядліва заключаны ў турму: #WeStandByYou кожны дзень», — гаворыцца ў паведамленні.
Міністр замежных справаў Літвы, парламентарый Габрыэлюс Ландзбергіс адзначыў:
«Сёння Міжнародны Дзень салідарнасці з палітвязнямі ў Беларусі. Пакуль Лукашэнка працягвае пераследваць смелых людзей, хто выступіў за дэмакратыю, нам варта пашыраць санкцыі, не ўзнагароджваць тырана за ягоную тыранію».
МЗС Даніі выказала салідарнасць
«Сёння адзначаецца Міжнародны дзень салідарнасці з палітвязнямі ў #Беларусі. Данія салідарная з многімі асобамі, якія ўтрымліваюцца пад вартай па палітычна матываваных абвінавачваннях толькі з-за іх мірнага патрабаванні асноўных правоў і дэмакратыі».
Больш за 100 нобелеўскіх лаўрэатаў падпісалі ліст у падтрымку лаўрэата Нобелеўскай прэміі міру Алеся Бяляцкага
21 траўня 2023 года – Міжнародны ПЭН, арганізацыя літаратараў і арганізацыя па абароне свабоды слова, публікуе ліст, падпісаны 103 нобелеўскімі лаўрэатамі, у якім выказваецца салідарнасць з пісьменнікам, праваабаронцам, лаўрэатам Нобелеўскай прэміі міру і сябрам ПЭНа Алесем Бяляцкім і асуджаецца жорсткае, няспыннае і сістэматычнае падаўленне беларускімі ўладамі незалежных меркаванняў.
«Мы салідарныя са шматлікімі пісьменнікамі, журналістамі, дзеячамі культуры, праваабаронцамі і грамадзянамі Беларусі, якія адбываюць доўгія турэмныя тэрміны за тое, што яны мірна выказвалі сваё меркаванне і казалі ўладзе праўду.
Мы падтрымліваем мужны народ Беларусі, які працягвае змагацца за свае чалавечыя правы. Кажучы словамі Алеся Бяляцкага, мы таксама верым, бо ведаем, што пасля зімы заўжды наступае Вясна».
У Ватыкане прайшла імша, арганізаваная амбасадамі
Амбасады Польшчы і Літвы ў Ватыкане арганізавалі святую Імшу, каб памаліцца за свабоду і выказаць салідарнасць з палітвязнямі ў Беларусі.
Прадстаўнікі дыпламатычных карпусоў розных краінаў далучыліся да акцыі чытання імёнаў палітвязняў у Вільні
Праваабарончы цэнтр "Вясна" запрасіў прадстаўнікоў дыпламатычнага корпуса Нарвегіі, Злучаных Штатаў Амерыкі, Літвы, Ірландыі, Польшчы, Нідэрландаў, Фінляндыі, Швецыі, Чэхіі, Эстоніі далучыцца да акцыі чытання імёнаў беларускіх палітычных зняволеных.
Чытанне імёнаў і сімвалічныя "кешары" – акцыі ў Вільні ў Дзень палітвязняў Беларусі
"Хросны" Ігара і Дар'і Лосікаў далучыўся да акцыі салідарнасці
Дэпутат Бундэгстага і "хросны" Ігара і Дар'і Лосікаў Робін Вагенер запісаў відэа з нагоды Дня салідарнасці з палітзняволенымі.
Today is the Day of Solidarity with more than 1480 political prisoners in #Belarus. Their fight for Democracy is not a crime but a human right. I call for the immediate and unconditional release of all political prisoners.#WeStandByyou #FreeThemAll #FreeIharandDariaLosik pic.twitter.com/J8yXWx0xcT
— Robin Wagener (@robinwagener) May 21, 2023
Праваабаронцы ўсяго свету выказалі салідарнасць
Салідарнасць з беларускімі палітзняволенымі выказаў Чарнігаўскі дом правоў чалавека. Прадстаўнікі праваабарончай арганізацыі далучыліся да акцыі з нагоды Дня палітвязняў у Беларусі.
Праваабаронцы сеткі Дамоў правоў чалавека выказалі салідарнасць, даслаўшы паштоўкі палітзняволеным калегам, каб паказаць, што яны не забытыя.
On the Day of Solidarity with Political Prisoners in #Belarus, we are sending cards to our imprisoned colleagues to show they are not forgotten. There are 1480+ political prisoners in Belarus. Free them all!
✏️ https://t.co/gdca10938T @viasna96 #WeStandByYou #FreeThemAll pic.twitter.com/MPXdyIs08P— Human Rights House Foundation (@HRHFoundation) May 21, 2023
Беларускіх палітвязняў падтрымалі праваабаронцы Human Rights Watch.
Праваабаронца Human Rights Watch Анастасія Круапэ адзначыла ў твітары, што ў Беларусі як мінімум 1525 палітзняволеных, сярод якіх мінімум 70 знаходзяцца ў крытычным стане:
Да падтрымкі далучыўся Нарвежскі Хельсінкскі Камітэт.
Інфармацыя дапаўняецца.
