У палітвязня Васіля Бераснева ў СІЗА значна пагоршылася здароўе

У актывіста аршанскага незалежнага прафсаюзу РЭП Васіля Бераснева, які знаходзіцца пад следствам у СІЗА № 1 Мінска, значна пагоршылася здароўе.

Пра гэта паведамляюць сваякі палітзняволенага, якія нядаўна атрымалі спатканне з Васілём.

Па іх словах, Васіль Бераснеў пакутуе ад моцных боляў у адзінай нырцы. Другую з прычыны анкалагічнага захворвання выдалілі раней, у 2018 годзе. На шматлікія просьбы і заявы вязня аб аказанні медычнай дапамогі, альбо накіраванні на абследаванне — нічога не адказваюць.

Адзінае — у крытычныя моманты ставяць абязбольвальную кропельніцу, што не вырашае праблемы.

На фоне праблем са здароўем, значна павысіўся ціск і зараз неабходна штодня прымаць адпаведныя лекі.

Нагадаем, Васіля Бераснева затрымалі па “справе прафсаюзаў” 19 красавіка 2022 года. Актывіста абвінавачваюць па ч.1 арт. 342 Крымінальнага кодэкса (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх)

Падтрымайце палітвязня паштоўкай ці лістом:  СІЗА-1. 220030, г. Мінск, вул. Валадарскага, 2, Васіль Ціханавіч Бераснеў.