Чарговы прысуд па "справе Зельцэра": 2,5 гады калоніі за каментар
Сцяпан Талкачоў
26 жніўня Брэсцкі абласны суд вынес рашэнне па справе палітзняволенага Сцяпана Талкачова. Ягоабвінавацілі ў здзяйсненні злачынства паводле ч. 1 арт. 130 "Распальванне расавай, нацыянальнай, рэлігійнай або іншай сацыяльнай варожасці ці варажнечы".
Судовае пасяджэнне ўзначаліла Ніна Шастак.
Да суда 30-гадовы Сцяпан Талкачоў знаходзіўся пад вартай больш за 11 месяцаў. Хлопца затрымалі 29 верасня 2021 года, на наступны дзень пасля таго, як у кватэры айцішніка Андрэя Зельцэра ў Мінску адбылася перастрэлка з сілавікамі, у выніку якой загінуў і сам Зельцэр, і супрацоўнік КДБ Дзмітрый Федасюк.
Навіна пра гэтую трагедыю імгненна разляцелася па краіне, а самі беларусы пачалі яе актыўна каментаваць, у тым ліку ў сацсетках.
У ліку каментатараў быў і Сцяпан Талкачоў. У Інстаграме з гэтай нагоды ён напісаў: "Адным КДБшнікам менш, адным больш. [Няма чаго] без запрашэння ў хаты чужыя ўрывацца".
Хлопца практычна адразу вылічылі, затрымалі і распачалі ў дачыненні да яго крымінальную справу паводле ч. 1 арт. 130 КК за распальванне варожасці.
Як перадае "Брэсцкая Вясна", падчас судовага пасяджэння Сцяпан не прызнаў сваю віну. Пры гэтым ён прызнаў аўтарства каментара, але падкрэсліў, што нічога ім не навязваў і нікога ні да чаго не заклікаў.
Паводле версіі дзяржаўнага абвінавачвання, чый бок на судзе прадстаўляла Вольга Грыцкевіч, Сцяпан "меў намер на распальванне варожасці ў дачыненні да супрацоўнікаў КДБ".
26 жніўня Брэсцкі абласны суд прызнаў Сцяпана Талкачова вінаватым у здзяйсненні злачынства паводле ч. 1 арт. 130 "Распальванне расавай, нацыянальнай, рэлігійнай або іншай сацыяльнай варожасці ці варажнечы", прызначыўшы яму ў якасці пакарання 2,5 гады пазбаўлення волі з адбываннем пакарання ў папраўчай калоніі ва ўмовах агульнага рэжыму.
