Сяброўцы Прэзідыума БСДП Людміле Волкавай прызначылі два гады калоніі

Сёння суд Ленінскага раёна Мінска агучыў прысуд палітзняволенай сяброўцы Прэзідыума БСДП Людміле Волкавай. Суддзя Юлія Шут прызнала яе вінаватай па ч. 1 арт. 342 Крымінальнага кодэкса (удзел у дзеяннях, якія груба парушаюць грамадскі парадак) за ўдзеле ў дзесяці паслявыбарчых акцыях пратэсту і прызначыла два гады калоніі ва ўмовах агульнага рэжыму, паведамляе тэлеграм-канал партыі. Менавіта такое пакаранне запрашваў дзяржабвінаваўца. Акрамя таго суддзя задаволіў пазоў Мінсктранса на суму 152 тысячы рублёў за блакіроўку руху грамадскага транспарту.

Людміла Волкава

Нагадаем, Людмілу затрымалі 19 студзеня – чатыры месяцы яна ўтрымліваецца пад вартай. Яе затрымалі наўпрост на працы і павезлі дадому на ператрус. Сілавікі забралі ў яе тэлефон і выдалілі ўсіх падпісчыкаў у афіцыйным тэлеграм-канале партыі, а сімволіку БСДП у ім замянілі на дзяржаўны герб.

Падчас следства было выяўлена дзесяць эпізодаў яе ўдзелу ў паслявыбарчых пратэстах 2020 году, за якія яе асудзілі. У БСДП мяркуюць, што трыгерам для яе затрымання стала яе скарга ў пракуратуру з просьбай вярнуць канфіскаваную падчас ператрусу тэхніку.

У Людмілы на свабодзе застаўся 6-гадовы сын Васіль. Яго яна выхоўвае адна.

Падтрымайце яе лістамі салідарнасці, грашовымі пераводамі і пасылкамі:

Людміла Вітальеўна Волкава

СІЗА-1, 220030, г. Мінск, вул. Валадарскага, 2