Два суды ў Мазыры, якія адбыліся ў адзін дзень, зрабілі закрытымі

Гаворка ідзе пра суды над Віталём Мелехам і над Аляксандрам Канашом.

Абодвум у віну ставяць два крымінальныя артыкулы: ч. 1 арт. 342 «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх» і арт. 364 «Гвалт альбо пагроза ўжывання гвалту ў дачыненні да супрацоўнікаў органаў унутраных спраў».

Нягледзячы на тое, што суды розныя, пацярпелымі ў абодвух выпадках прызнаныя адны і тыя ж супрацоўнікі МУС. Пры гэтым галоўным пацярпелым па абодвух справах праходзіць начальнік ДАІ Мазырскага РАУС Валянцін Пілер.

У спісе пацярпелых значацца і такія прозвішчы супрацоўнікаў МУС, як Ропат, Кядроў, Патоцкі, Галанчук, Падабед, Валынец, Фешчанка…

Дарэчы, гэтыя ж супрацоўнікі МУС праходзілі пацярпелымі па справе мазырскіх футбольных заўзятараў Данііла Скіпальскага, Аляксандра Сузько, Паўла Дворака, Аляксандра Цімашэнкі і Кірыла Канапацкага.

Іх абвінавацілі і прызналі вінаватымі ў здзяйсненні злачынстваў па аналагічных крымінальных артыкулах (ч. 1 арт. 342 і арт. 364). На самым першым судовым пасяджэнні па хадайніцтве дзяржабвінавачання працэс таксама зрабілі закрытым для сваякоў, грамадскасці і журналістаў.

Нагадаем, суд становіцца закрытым пасля адпаведнай аб'явы, зробленай суддзёй падчас працэсу. Згодна з арт. 23 КПК, судовы разгляд крымінальных спраў павінен праводзіцца па агульным правілам, адкрыта і галосна. У парадку выключэння дапускаецца закрытае судовае пасяджэнне ў наступных выпадках:

• у інтарэсах аховы дзяржаўных сакрэтаў і іншай ахоўнай законам таямніцы;
• па справах аб злачынствах, учыненых асобамі, якія не дасягнулі 16-гадовага ўзросту; 
• па справах аб палавых злачынствах і іншых справах у мэтах прадухілення выдавання звестак аб інтымных баках жыцця асоб, якія ўдзельнічаюць у справе, альбо звестак, якія прыніжаюць іх годнасць;
• калі гэтага патрабуюць інтарэсы бяспекі пацярпелага, сведкі ці іншых удзельнікаў крымінальнага працэсу, а таксама членаў іх сем'яў або блізкіх сваякоў і іншых асоб, якіх яны абгрунтавана лічаць блізкімі.

Нажаль праваабаронцам вядома толькі тое, што ў выпадку з судом над Мелехам і Канашом суд зрабілі закрытым па хадайніцтве пацярпелых.

Пра абвінавачаных невядома амаль нічога. Ёсць толькі звесткі пра тое, што Аляксандру Канашу 20 год і яго затрымалі яшчэ 1 снежня мінулага года. 

«Вясна» будзе сачыць за развіццём падзей, наколькі гэта будзе магчыма.