#FreeViasna: Тыднёвы агляд навінаў пра зняволеных праваабаронцаў “Вясны”
17 верасня распачалася кампанія салідарнасці са зняволенымі праваабаронцамі “Вясны” - #FreeViasna. Сабралі навіны за мінулы тыдзень пра “вясноўцаў”, што знаходзяцца за кратамі.
30 лістапада дэпутаты Еўрапарламента і запрошаныя выступоўцы абмеркавалі юрыдычныя інструменты прыцягнення да міжнароднай адказнасці людзей, адказных за цяжкія злачынствы ў галіне правоў чалавека.
Ва ўступным слове старшыня падкамітэта па правах чалавека Еўрапарламента Марыя Арэна ўзгадала лідараў “Вясны” Алеся Бяляцкага і Валянціна Стэфановіча, якія з сярэдзіны ліпеня знаходзяцца ў СІЗА №1 на вуліцы Валадарскага, а таксама пяцярых іншых “вясноўцаў” у зняволенні. Яна падкрэсліла, што інфармацыя пра затрыманых вельмі абмежаваная і далёка не ўсё вядома пра умовы іх утрымання і сутнасць абвінавачванняў.
У мерапрыемстве ўзяла ўдзел Аліна Стэфановіч - жонка зняволенага "вясноўца" Валянціна Стэфановіча. Яна падкрэсліла:
"Лісты ад зняволеных "вясноўцаў" прыходзяць нерэгулярна, як відавочна і яны не атрымоўваюць усе пасланні з розных куткоў свету. Але “Вясна” не спыняе сваю дзейнасць ні па адным з накірункаў: ад траўня 2020 года па цяперашні час праваабаронцы зафіксавалі больш за 37 000 фактаў адвольных затрыманняў, было задакументавана каля 1500 выпадкаў катаванняў і жорсткага абыходжання з затрыманымі, палітычнымі зняволенымі прызнана амаль 900 чалавек. "Вясна" працягвае пастаянны маніторынг судовых разбіральніцтваў па палітычна матываваных крымінальных справах, аналізуе сабраныя звесткі і прадастаўляе справаздачы ў міжнародныя органы".
Валянцін Стэфановіч: “Мы, беларусы, нарэшце палюбілі самі сябе, з усімі нашымі хібамі і вартасцямі”
Палітзняволены "вясновец" Валянцін Стэфановіч даслаў шчымлівы ліст з-за кратаў, у якім паразважаў пра любоў беларусаў да саміх сябе пасля падзеяў мінулага года.
“Пра вядомую асобу вы ўжо перагнулі. Ну якая я вядомая асоба? Я ж не зорка шоў-бізнесу ці нейкі вядомы кінаактор, але і яны ўсе толькі людзі найперш. Я самы звычайны чалавек, такі як вы, як вашы сябры. <…>
Дзякуй вялікі за тое, што знаходзіце час напісаць мне лісты. Дзякуй за вашую спагаду і салідарнасць! Мяркую, што салідарнасць — гэта мабыць самае галоўнае, што мы атрымалі ў выніку мінулагодніх падзеяў. Мы, беларусы, нарэшце палюбілі самі сябе, з усімі нашымі хібамі і вартасцямі. Для нас, якія ўвесь час пакутвалі на комплексы нацыянальнай непаўнавартасці, гэта вельмі важна — любіць сябе”.
Праваабаронца кажа, што ў яго ўсё нармальна, “наколькі гэта магчыма” ва ўмовах СІЗА:
“Часы цяжкія, канешне, насталі, але самае галоўнае, яно ў нас — у галавах і сэрцах. А гэта ніхто не можа змяніць. Так што ўсё будзе добра!”
За мінулы тыдзень не было навінаў ад старшыні "Вясны" Алеся Бяляцкага.
Дасылайце лісты ці паштоўкі Алесю і Валянціну:СІЗА-1. 220030, г. Мінск, вул. Валадарскага, 2 Аляксандру Віктаравічу Бяляцкаму |
Уладзімір Лабковіч: "Чытаю Фрэйда. Газеты. Пасля газетаў нават Фрэйд не дапамагае"
У апошніх лістах на волю юрыст "Вясны" Уладзь Лабковіч скардзіўся, што ў яго моцна баліць галава: доўгі час ён не мог нармальна спаць па начах, таму амаль не пісаў адказаў на лісты. Пасля таго, як праваабаронцу выдалі лекі, ён стаў пачувацца лепей.
Ён адзначае, што вялікая колькасць яго лістоў не даходзіць да адрасатаў:
"Па ліку гэта хіба ўжо пяты ліст. Я вам ужо пісаў і пра свае татухі, і пра рок-музыку, пра вас. Так шкада, што столькі добрых словаў згубіліся мабыць незваротна. <...>
Шкада, што мае развагі пра "Порнафільмы" і "Гражданскую оборону" зніклі. Ну можа яшчэ пагаворым. Толькі б хоць лісты перасталі губляцца".
У астатнім Уладзімір Лабковіч адзначае, што нічога не мяняецца:
"У мяне ўсё як і раней. Чытаю Фрэйда. Газеты. Пасля газетаў нават Фрэйд не дапамагае".
Працягваецца акцыя "Не толькі Бродскі" ў падтрымку Уладзя Лабковіча
"У мінулым лісце я пісаў, што чарговы раз захапіўся вершамі Бродскага. Пачытайце "Письма римскому другу" і "Письмо генералу 2". Як па мне гэта найлепшае, што сказана ў вершах", - рэкамендуе Уладзь.
А мы прапануем падтрымаць праваабаронцу і паўдзельнічаць у акцыі "Не толькі Бродскі".
Для гэтага напішыце вашыя ўласныя вершы ці абярыце вершы розных аўтараў, размясціце іх у сацсетках з хэштэгам #FreeViasna або дашліце нам на пошту freeviasna@gmail.com. У акцыі могуць прыняць удзел як паэты, так і ўсе неабыякавыя людзі.
Дасылайце лісты падтрымкі і вершы Уладзю:СІЗА-1. 220030, г. Мінск, вул. Валадарскага, 2 |
Жонка Леаніда Судаленкі: "Муж верыць, што рана ці позна ўсё павінна змяніцца, — і надыдзе пераломны момант"
Пасля вынясення прысуду жонка праваабаронцы Аксана Судаленка звярнулася ў Гомельскі абласны суд з просьбай аб спатканні ў надзеі, што крымінальная справа ўжо накіраваная туды для абскарджвання. Аднак ейную заяву перанакіравалі ў Цэнтральны суд г. Гомеля, дзе суддзя Сяргей Салоўскі, які вынес прысуд Леаніду, аператыўна даў згоду на спатканне. Жонка Леаніда Судаленкі распавяла, як прайшла сустрэча з мужам.
Жонка Леаніда Судаленкі пра сустрэчу ў СІЗА: "Нават калі яму давядзецца адседзець, ён усё адно сваё імя сумленнае абароніць"
Жонка праваабаронцы адзначыла, што яго цікавіць усё, што адбываецца ў краіне, але ў Леаніда інфармацыйны вакуум: ён мала пра што ведае, таму што з газет атрымлівае толькі "СБ: Беларусь сегодня", "Гомельскую праўду" і "Народную газету", дзе няма ніякай актуальнай інфармацыі..
"Муж верыць, што рана ці позна ўсё павінна змяніцца, скончыцца — і надыдзе пераломны момант. Я ведаю свайго мужа, ён не пакіне гэтую палітычную справу ў адносінах да сябе — гэта дакладна. Бо ён любіць абараняць простых людзей, дапамагаць ім парадай, справай, усім чым заўгодна, думаю, ён і цяпер не застаецца ўбаку: пры любой магчымасці падкажа, як, каму і што трэба зрабіць. І тыя незаконныя палітычныя артыкулы, якія людзям былі інкрымінаваныя, і тая сітуацыя, у якой мы таксама аказаліся, — мой муж не пакіне ўсё гэта проста так і ўсёткі даможацца справядлівасці. Нават калі яму давядзецца адседзець, ён усё адно сваё імя сумленнае абароніць і верне яго сабе назад".
За мінулы тыдзень не было навінаў ад валанцёркі "Вясны" Таццяны Ласіцы.
Падтрымайце Таццяну і Леаніда:СІЗА-3. 246003, г. Гомель, вул. Кніжная, 1А Таццяне Леанідаўне Ласіцы |
Пра Марфу Рабкову ўзгадалі ў Міжнародны дзень жанчын-праваабаронцаў
Праваабаронца "Вясны" Марфа Рабкова ажыццяўляла назіранне за правядзеннем мірных сходаў у жніўні-верасні 2020 года, займалася дакументаваннем сведчанняў катаванняў і іншых відаў жорсткага абыходжання ў дачыненні да затрыманых удзельнікаў акцый пратэсту, брала актыўны ўдзел у кампаніі незалежнага назірання за выбарамі “Праваабаронцы за свабодныя выбары”.
Была затрыманая 17 верасня 2020 года і з тых часоў знаходзіцца ў следчым ізалятары.
29 лістапада — Міжнародны дзень жанчын-праваабаронцаў
Amnesty International выступіла з заявай, у якой асуджае прад'яўленне новых абвінавачванняў Марфе Рабковай.
"Справа Марфы Рабковай відавочна паказвае жахі, з якімі ў наш час сутыкаюцца праваабаронцы і наогул грамадзянская супольнасць Беларусі. За апошнія паўтара года ўрад Аляксандра Лукашэнкі фактычна паставіў па-за законам усю праваабарончую супольнасць краіны, зняволіўшы ў турму паводле надуманых абвінавачванняў дзясяткі праваабаронцаў", — заявіла Мары Стразерс, дырэктарка Amnesty International па Усходняй Еўропе і Цэнтральнай Азіі.
"Беларускія ўлады павінны неадкладна і безумоўна вызваліць не толькі Марфу Рабкову, але і ўсіх затрыманых ейных калегаў з "Вясны", а таксама іншых актывістаў, якіх працягваюць адвольна затрымліваць па ўсёй краіне. Неабходна спыніць бязлітасны пераслед арганізацый грамадзянскай супольнасці Беларусі".
Amnesty International: Марфе Рабковай пагражае да 20 гадоў турмы па надуманых абвінавачваннях
За мінулы тыдзень не было навінаў ад валанцёра "Вясны" Андрэя Чапюка.
Дасылайце лісты ці паштоўкі Марфе ды Андрэю:СІЗА-1. 220030, г. Мінск, вул. Валадарскага, 2 Марыі Аляксандраўне Рабковай |
Беларуская дыяспара ў Гамбургу далучылася да Дня салідарнасці з беларускімі палітычнымі зняволенымі і правяла акцыю іх падтрымкі 27 лістапада.
Удзельнікі акцыі трымалі ў руках бела-чырвона-белы сцяг з імёнамі палітвязняў, а таксама выявы некаторых з іх, у тым ліку зняволеных прадстаўнікоў ПЦ “Вясна”.
- Акцыя падтрымкі палітвязняў, арганізаваная беларускай дыяспары ў Гамбургу
Стань на абарону праваабаронцаў!
Праваабарончы цэнтр “Вясна” ў гэтым годзе адсвяткаваў 25-годдзе сваёй дзейнасці ў Беларусі. І за сваю мірную праваабарончую дзейнасць цяпер за кратамі знаходзіцца сем “вясноўцаў”.
Падпішы петыцыю за іх вызваленне!
Падпішы петыцыю за вызваленне “вясноўцаў”
