viasna on patreon

Два з паловай гады «хіміі» за абразу супрацоўнікаў міліцыі прысудзілі жыхару Віцебска

2021 2021-11-05T21:47:14+0300 2021-11-05T21:47:16+0300 be https://spring96.org/files/images/sources/safonau-1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Аляксандр Сафонаў у судзе. Фота: "Віцебская Вясна".

Аляксандр Сафонаў у судзе. Фота: "Віцебская Вясна".

Чарговую справу аб абразе ў сацсетцы «Аднакласнікі» супрацоўніка ДАІ з Ганцавічаў Ігара Вольніча разгледзеў 5 лістапада суд Першамайскага раёну Віцебска. Гэтым разам па справе паводле арт. 369 КК («абраза прадстаўніка ўлады») праходзіў 41-гадовы цясляр аднаго з менскіх будтрэстаў Аляксандр Сафонаў.

Яго абвінавачваюць у абразе ажно двух супрацоўнікаў МУС. Апроч Вольніча, ён «пакрыўдзіў» яшчэ і капітана міліцыі з Бабруйску Андрэя Комара.

Справу разглядала суддзя Алена Жук. Пацярпелыя ў сувязі з рознымі абставінамі ў судовым паседжанні ўдзелу не бралі. Аляксандр Сафонаў віну прызнаў, ад паслугаў адваката адмовіўся, піша “Віцебская Вясна”.

«Пад уплывам агульнага негатыўнага настрою»

Паводле папярэдняга следства, Аляксандр Сафонаў, знаходзячыся ў вёсцы Бароўка Лепельскага раёну, 24 чэрвеня 2020 году са свайго мабільнага тэлефону ў сацсетцы «Аднакласнікі» наўмысна зрабіў каментар зневажальнага зместу ў дачыненні да старшага лейтэнанта ДАІ Ігара Вольніча. Допіс з ужываннем ненарматыўнай лексікі быў пакінуты на старонцы Вольгі Карач пад фота з надпісам: «Гэта я так спрытна прыціснуў да тратуару галаву мірнага дэманстранта падчас затрымання. Ігар Вольніч, супрацоўнік ДПС ДАІ г. Ганцавічы». «Пад уплывам агульнага негатыўнага настрою» Сафонаў пакінуў пад фота некалькі сказаў, ужыўшы словы «г…он», «м…зи», «т…ри».

Таксама ў перыяд ад 9-га па 11 ліпеня, знаходзячыся ў Менску, Сафонаў у «Аднакласніках» на старонцы Карач пакінуў другі абразлівы каментар –  у дачыненні да супрацоўніка Першамайскага РАУС Бабруйску капітана міліцыі Андрэя Комара. Выкарыстаў словы «ж...па», «очередной мус...нок», «пид...к».

Паабяцаў, што напіша пацярпелым лісты

Аляксандр Сафонаў віну прызнаў. Запэўніў, што неўзабаве напіша лісты абодвум пацярпелым і папросіць прабачэння. Патлумачыў, што ў той час «знаходзіўся ў складаным псіхаэмацыйным стане», выкліканым сямейнымі абставінамі. Праглядаў каментары ў «Аднакласніках», якія ў асноўным былі негатыўнага зместу, і не думаў пра наступствы. Прыгадаў, што аднойчы быў незаконна затрыманы міліцыянтам ППС і спантанна выплюхнуў эмоцыі на Вольніча і Комара. 

Запэўніў, што ў палітычных пратэстах 2020 году ўдзелу не браў.

«Падарваў прэстыж упраўленчай дзейнасці»

Падчас судовых спрэчак пракурорка заявіла, што «прыведзеныя ў судзе факты ў сваёй сукупнасці могуць быць пакладзеныя ў аснову абвінаваўчага прысуду, бо віна Сафонава даказана ў поўным аб’ёме». На думку пракуратуры, абодва каментары прыніжаюць гонар і годнасць супрацоўнікаў міліцыі, падрываюць аўтарытэт улады. Пракурорка засяродзіла ўвагу, што ўчыненае Сафонавым злачынства ёсць злачынствам, «скіраваным супраць парадку кіравання». Яно «падрывае прэстыж упраўленчай дзейнасці», «ставіць пад пагрозу нармальнае функцыянаванне сістэмы дзяржаўнага кіравання».

Пракурорка прасіла суд прызнаць Сафонава вінаватым у публічнай абразе прадстаўніка ўлады ў сувязі з выкананнем ім службовых абавязкаў і на падставе санкцый арт. 369 КК прызначыць пакаранне ў выглядзе абмежавання свабоды з накіраваннем у папраўчую ўстанову адкрытага тыпу на два гады і шэсць месяцаў.

Таксама прасіла задаволіць пазоў аб кампенсацыі маральнай шкоды, заяўлены пацярпелымі Вольнічам і Комарам. Меру стрымання да набыцця прысудам законнай моцы прасіла пакінуць ранейшую – падпіску аб нявыездзе.

У сувязі з адсутнасцю адваката Аляксандр Сафонаў абараняў сябе сам. 

У прыватнасці, ён заявіў, што «не з’яўляецца палітычным інтрыганам і не мае нянавісці да сілавых структураў». Адзначыў, што ён добры чалавек. Запэўніў, што, застаўшыся на волі, сваёй працай прынясе больш карысці, дапаможа маці-пенсіянерцы і сыну, якія патрабуюць ягонага клопату. Прасіў не абмяжоўваць ягонай свабоды. 

Суд пастанавіў пакараць Сафона абмежаваннем волі з накіраваннем у папраўчую ўстанову адкрытага тыпу тэрмінам на два гады і шэсць месяцаў. У дадатак ёе павінен выплаціць матэрыяльную кампенсацыю "пакрыўджаным" міліцыянтам у памеры 1 500 рублёў.

Апошнія навіны

Партнёрства

Сяброўства