Суд над Леанідам Судаленкам, Таццянай Ласіцай і Марыяй Тарасенка праходзіць у закрытым рэжыме Дапоўнена

У судзе Цэнтральнага раёна г. Гомеля 3 верасня распачаўся суд над праваабаронцам “Вясны” Леанідам Судаленкам і валанцёркамі арганізацыі Таццянай Ласіцай і Марыяй Тарасенка.

Усіх іх вінавацяць у арганізацыі і падрыхтоўцы дзеянняў, што груба парушаюць грамадскі парадак (ч. 1 арт. 342 КК), і навучанні і падрыхтоўцы асобаў для ўдзелу ў такіх дзеяннях, а таксама іх фінансаванні або іншым матэрыяльным забеспячэнні (ч. 2 арт. 342 КК).

Справу разглядае суддзя Сяргей Салоўскі.

Суд над гомельскімі праваабаронцам і валанцёркамі: Што вядома пра справу і суддзю?

"Вясна" распавядае, за што будуць судзіць праваабаронцу і валанцёрак, чаму гэтая крымінальная справа з'яўляецца палітычна матываванай і што вядома пра суддзю Салоўскага.

У залу суда былі дапушчаныя прадстаўнікі праўладных СМІ і ўсяго пяць слухачоў. Ахова суда патлумачыла такія абмежаванні складанай эпідэміялагічнай сітуацыяй, а фотаздымкі, якія былі зробленыя ў холе будынка, патрабавала выдаліць.

У будынку суда перад пасяджэннем па справе Судаленкі, Ласіцы і Тарасенка. Фота "Радыё Свабода"

Перад пачаткам судовага пасяджэння Леанід Судаленка пасміхаўся, паказваў знак “V”, жартаваў. Сказаў жонцы, што да новага года пасядзіць, а потым “пойдзе ў войска”, запытваўся, у якую школу пайшоў малодшы сын. Аднак праваабаронцу зрабілі заўвагу, а ягоную жонку папярэдзілі, што выведуць з залы, калі яна будзе размаўляць з абвінавачаным.

Пры ўстанаўленні асобы Леанід прасіў суд казаць гучней, бо нічога не чуе, аднак Салоўскі адказаў, што суд кажа так, як мае магчымасць.

Суд па складах называў прозвішча праваабаронцы і запытваўся пра правільнасць вымаўлення. На гэта Леанід адказаў:

“Мая настаўніца ў пачатковай школе называла Судаленка”.

Суд настойваў на тым, каб абвінавачаны назваў поўнасцю свае дадзеныя. Аднак Судаленка казаў, што ўсе ягоныя анкетныя дадзеныя маюцца ў матэрыялах справы і яны не змяніліся.

Таццяна Ласіца і Леанід Судаленка ў залі суда. Фота "Радыё Свабода"

На пытанне пра месца пражывання Леанід Судаленка адказаў:

“Зараз пражываю – СІЗА-3, на вул. Кніжная, 1А. Апошнія 240 дзён я пражываю па гэтым адрасе”.

Абаронца Судаленкі звярнулася да суда і паведаміла, што ў праваабаронцы канфіскавалі паперу і асадку, ён не бачыць перад сабой тэксту абвінавачвання і не мае магчымасці запісваць нават тое, што цяпер адбываецца ў працэсе. На гэта Салоўскі адказаў, што суд не можа даваць указанні канвою, бо ён не падпарадкоўваецца суду.

“Пытанні ў дадзеным выпадку павінны быць заяўленыя да таго, хто канфіскоўваў, а не да суда. Я нічога не адбіраў”, – сказаў Сяргей Салоўскі.

Тады адвакатка прасіла забяспечыць Судаленку пісьмовымі прыналежнасцямі і прапаноўвала перадаць яму сваю асадку. Аднак суд сказаў, што менавіта на адвакатку ўскладзены абавязак якаснай абароны, і перайшоў да заяўленых хадайніцтваў у пісьмовым парадку.

Першым такім хадайніцтвам было зачытанае хадайніцтва ад пракуратуры, у якім значылася просьба разглядаць крымінальную справу ў закрытым судовым пасяджэнні ў мэтах неразгалошвання сведчанняў, што ўтрымліваюць банкаўскую таямніцу аб руху грашовых сродкаў на рахунках, якая абараняецца законам, а таксама ў інтарэсах забеспячэння бяспекі сведкаў і іншых удзельнікаў крымінальнага працэсу, членаў іх сем’яў і блізкіх родных.

Прадстаўнікі пракуратуры Яўген Фартушняк і Кірыл Вышнякоў падтрымалі заяўленае хадайніцтва ў поўным аб’ёме.

Абаронцы абвінавачаных казалі, што нязгодныя, запэўнівалі, што няма такіх сведкаў па справе, якія б паведамілі пра тое, што баяцца разгалошвання сваіх звестак, а сама справа не ўтрымлівае дзяржаўных сакрэтаў. Калі ж з’явіцца нехта, хто баіцца за сябе і сваіх родных, то можна зрабіць адно ці два пасяджэння закрытымі, але не ўвесь працэс. Таццяна Ласіца і Марыя Тарасенка падтрымалі пазіцыю абароны.

Леанід Судаленка ўдакладніў, у якім томе справы знаходзіцца хадайніцтва пракуратуры. На што суд адказаў: “Ліст справы 145, том 79”. Тады праваабаронца сказаў, што не знаёмы з матэрыяламі 79 тома і прасіў суд даць час на азнаямленне з ім. І выступіў супраць разгляду справы ў закрытым рэжыме.

Аднак суддзя Салоўскі вынес пастанову, якой вырашыў праводзіць суд над праваабаронцам Леанідам Судаленкам і валанцёркамі “Вясны” Таццянай Ласіцай і Марыяй Тарасенка у закрытым пасяджэнні на працягу ўсяго разбіральніцтва.

Пасля гэтага ўсе слухачы былі вымушаныя выйсці з залі суда.

Нагадаем, Леанід Судаленка з 18 студзеня знаходзіцца пад вартай у СІЗА. У ізалятары з 21 студзеня таксама ўтрымліваецца Таццяна Ласіца. У дачыненні да Марыі Тарасенка абраная мера стрымання ў выглядзе абавязацельства аб яўцы і падпіскі аб нявыездзе.

Як распавёў у сваіх лістах праваабаронца "Вясны", у віну яму ставіцца:

• эпізод з дровамі, якія Леанід прывёз дзецям з шматдзетнай сям’і, бацьку якой потым асудзілі за "беспарадкі”;
• відэа на ютубе з "Рудабельскай паказухі", дзе праваабаронца тлумачыць блогеру Андрэю Павуку, што такое пратэст людзей;
• заклік у сацсетках сустрэць з ІЧУ жыхарку Гомеля Марыю Тульжанкову пасля 15 сутак;
• семінар па лічбавай бяспецы для праваабаронцаў;
• аплата штрафаў, пошлін за зварот у суд і дапамогу адвакатаў.

Па справе было апытана больш за 200 сведак, а матэрыялаў больш за 77 тамоў.