За інсталяцыю з партрэтам Лукашэнкі і каментар у тэлеграме — тры з паловай гады калоніі
У Гомелі вынеслі прысуд 25-гадоваму гамельчуку Артуру Рыбіну, які зрабіў інсталяцыю з партрэтам Лукашэнкі і выклаў яе фота ў інтэрнэт. Рыбіну прад'явілі абвінавачванне па двух артыкулах Крымінальнага кодэкса: «Хуліганства» (ч. 1 арт. 339) і «Распальванне расавай, нацыянальнай, рэлігійнай альбо іншай сацыяльнай варожасці» (ч. 1 арт. 130), пішуць «Моцныя навіны».
- Артур Рыбін
Згодна з абвінавачваннем, у лістападзе мінулага года Артур Рыбін зрабіў інсталяцыю з партрэтам Аляксандра Лукашэнкі і надпісам «Гары ў пекле», усталяваў яе на адным з гарадскіх пустак, сфатаграфаваў і выклаў фота ў тэлеграм-чат. Абвінавачванне ўгледзела ў гэтых дзеяннях асаблівы цынізм, імкненне дэстабілізаваць абстаноўку ў грамадстве і дэзарганізаваць працу праваахоўных органаў.
Акрамя таго, з'яўляючыся ўдзельнікам іншага тэлеграм-чата, ён размясціў у ім каментары адносна таго, як уяўляе сабе пратэсную актыўнасць у Беларусі вясной 2021 года: "Увесну трэба выходзіць і не сыходзіць з вуліцы. Калі цябе б'юць, можна біць у адказ". У ім следства пабачыла распальванне сацыяльнай варожасці і варажнечы.
Малады чалавек прызнаў, што здзяйсняў тыя дзеянні, у якіх яго абвінавачваюць, і раскаяўся. Аднак ён падкрэсліў, што не лічыць, што здзейсніў хуліганства, і не пацвярджае, што яго дзеянні былі накіраваныя на распальванне варожасці ў дачыненні да супрацоўнікаў міліцыі.
Пракурор Жанна Дударава запатрабавала для Артура Рыбіна пакаранне ў выглядзе чатырох гадоў пазбаўлення волі ў папраўчай калоніі агульнага рэжыму. Гомельскі абласны суд прысудзіў Артура Рыбіна да трох з паловай гадоў пазбаўлення волі з адбываннем у калоніі агульнага рэжыму.
Абаронца Артура Рыбіна: У суда не павінна быць задачы – адпомсціць маладому чалавеку
