Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць на сайце Беларускага Радыё Рацыя па любых са спасылак тут, альбо тут.
Анонс праграмы на 23 лютага:
Хроніка: Рэканструем тое, як 16 лютага праходізіл вобшукі ў праваабаронцаў “Вясны”, журналістаў і актывістаў. Як паводзілі сябе сілавікі, што забралі, у каго выпільвалі дзверы… і, галоўнае, якая пазіцыя на гэты конт у МУС і што на гэта адказваюць праваабаронцы?
Падзея: Падчас вобшуку быў затрыманы праваабаронца “Вясны” Зміцер Салаўёў — яго пакаралі па “народным” артыкуле 23.34 КаАП на 12 сутак. Суд над ім быў відавочна палітычна-матываваны, а за Пагоню караць нельга — у рубрыцы паглядзім, як судзілі і асудзілі Змітра.
Крымінальны пераслед: Дзяржава працягвае рэпрэсаваць па палітычных матывах. Пачаўся суд на Віктарам Бабарыкам, а валанцёраў яго штаба ці ўжо асудзілі (як Лявона Халатрана) ці працягваюць судзіць (як Антона Бяленскага). У рубрыцы узгадаем таксама гісторыю пераследу палітвязня Ігната Сідорчыка: 17 лютага яго асудзілі на “хімію” у Маскоўскім судзе — у тым жа судзе, дзе зараз праходзіць працэс над Бабарыкам і дзе з-за гэтага перанеслі суд над Бяленскім.
У музычных паўзах — кампазіцыі ў выкананні гурта “Разбітае Сэрца Пацана”, удзельнікі якога былі затрыманы на іх уласным канцэрце, а зараз адбываюць суткі.
