Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць на сайце Беларускага Радыё Рацыя па любых са спасылак тут, альбо тут.
Анонс праграмы на 5 студзеня:
Крымінальны пераслед: Агляд палітычна матываваных судоў і прысудыў, якія выносіліся на мінулым тыдні: за штуршок амапаўца, за блакаванне дарогі, а таксама за “заклікі” і намеры.
Каментар эксперта: Разам з праваабаронцай “Вясны” Валянцінам Стэфановічам паспрабуем разабрацца ў справе Аўтуховіча ды не толькі: “Верагодня, што ва ўладаў ёсць задача стварыць некалькі такіх справаў нібы па тэрарыстычных групах. І натуральна, што яны гэта ўжываюць у мэтах запалохвання грамадства”.
Каментар: Як змянілася сітуацыя ў Мінскім раёне “Каскад”, які адзначыўся сваёй пратэстнай актыўнасцю? Ці памятаюць яны пра палітзняволеную Марфу Рабкову, якая жыла там? – на гэтыя пытанні адкажа яе муж і жыхар “Каскада” Вадзім Жаромскі.
Асоба: Упершыню суд у Беларусі задаволіў скаргу на адмову ва ўзбуджэнні крымінальнай справы па катаваннях у жніўні. Скаргу ж падаў непаўнагадовы мінчук Пётр Кірык разам са сваёй маці. У рубрыцы хлопец успомніць, як яго затрымлівалі і збівалі ў жніўні.
У музычных паўзах — кампазіцыі ў выкананні гурта Litesound.
