Бацькам Марфы Рабковай патрэбен догляд: падпішыце паручальніцтва за яе вызваленне з-пад варты
Каардынатарка Валанцёрскай службы "Вясны" Марфа Рабкова. Фота Spring96.org
Працягваецца кампанія па зборы паручальніцтваў ад грамадзян за вызваленне праваабаронцы “Вясны” Марфы Рабковай з-пад варты. Марфа ўтрымліваецца ў Следчым ізалятары №1 Мінска.
Чаму важна, каб Марфу зараз вызвалілі пад падпіску ад нявыездзе?
Да свайго нечаканага затрымання Марфа Рабкова кожны тыдзень на некалькі дзён ездзіла з Мінска на Гомельшчыну, у Добруш, каб аказаць дапамогу і падтрымаць хворых бацькоў. У маці - сур’ёзныя праблемы са спінай, яна ў асноўным вымушаная ляжаць, бо перасоўваецца з цяжкасцю. Бацька Марфы хворы на анкалогію. Зараз ён у цяжкім стане знаходзіцца ў гомельскім шпіталі.
Апрача гэтага, супрацоўнікі ГУБАЗіК падчас вобшуку канфіскавалі грошы, якія Марфа збірала для лячэння бацькоў.
Ведаючы пра сітуацыю са станам здароўя бацькоў, супрацоўнікі міліцыі таксама спрабавалі шантажаваць Марфу, а за дачу неабходных ім паказанняў – абяцалі пасля прад'яўлення абвінавачвання выпусціць яе пад падпіску аб нявыездзе. Але гэтага не адбылося.
Калі вы таксама лічыце, што змяшчэнне праваабаронцы "Вясны" Марфы Рабковай у СІЗА неабгрунтавана, запаўняйце хадайніцтвы і перадавайце яго ў “Вясну” для падачы ў Следчы камітэт.
Зрабіць гэта можна двума спосабамі да чацвярга 8 кастрычніка ўключна:
- прынесці на офіс "Вясны" па адрасе: г. Мінск, праспект Незалежнасці, 78А-48;
- даслаць поштай па гэтым жа адрасе: г. Мінск, праспект Незалежнасці, 78А-48, 220012.
Узор падпіскі, які можна спампаваць і запоўніць, мы пакінулі пад матэрыялам.
На падставе Вашых паручальніцтваў праваабаронцу "Вясны" Марфу Рабкову могуць вызваліць з-пад варты.
Нагадаем, каардынатарка Валанцёрскай службы ПЦ “Вясна” Марфа Рабкова была затрыманая 17 верасня ў Мінску. Ёй прад'яўлена абвінавачванне па ч.3 арт. 293 Крымінальнага кодэкса — навучанне ці іншая падрыхтоўка асоб для ўдзелу ў масавых беспарадках, альбо фінансаванні такой дзейнасці. Цяпер Марфа знаходзіцца пад вартай у СІЗА №1 у Мінску. Санкцыя артыкула, які ёй інкрымінуецца, прадугледжвае арышт або пазбаўленне волі на тэрмін да трох гадоў. Марфа прызнаная палітычнай зняволенай і вязнем сумлення.
Праваабаронцы "Вясны" лічаць, што спробы абвінаваціць Марфу Рабкову ў падрыхтоўцы масавых беспарадкаў з’яўляюцца неабгрунтаванымі, надуманымі і палітычна матыванымі, накіраванымі на перашкоду яе праваабарончай дзейнасці. Палітычна матываваны пераслед Марфы Рабковай адбываецца на фоне бязлітаснай вайны, якую улады абвясцілі ўсяму беларускаму грамадству.
