Сёння “Гроднааблсаюздрук”, нягледзячы на заключаную дамову, адмовіўся ўзяць на рэалізацыю першы ў бягучым годзе нумар газеты “День”

Прыблізна а 6.50 супрацоўнікі рэдакцыі даставілі газету ў аддзел экспедыцыі Гандлёвага Рэспубліканскага Унітарнага Падпрыемства “Гроднааблсаюздрук”. Аднак кіраўнічка аддзела экспедыцыі Яніна Дзікевіч адмовілася прыняць наклад газеты. У сваёй адмове яна спаслалася на загад намесніцы начальніка ГРУП “Гроднааблсаюздрук” Галіны Макарэвіч. Усе спробы галоўнага рэдактара “Дня” Міколы Маркевіча знайсці яе скончыліся безвынікова.

Дамова на распаўсюджванне і экспедыяванне рознічных накладаў ТДА “Дзеньпрэс” з ГРУП “Гроднааблсаюздрук” была заключана 22 студзеня бягучага году. Паводле дамовы, апошняе брала на сябе абавязак узяць на распаўсюджванне ў Гродна і вобласці 450 асобнікаў газеты “День”.

Прэс-служба ГА “Беларуская асацыяцыя журналістаў”