"...А не то сядзеш на доўга-доўга. Зразумеў?" Блогеру Андрэю Павуку ізноў пагражаюць

2020 2020-04-07T13:37:31+0300 2020-04-14T11:16:29+0300 be https://spring96.org/files/images/sources/pavuk_2711.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Андрэй Павук. Фота з сайта baj.by

Андрэй Павук. Фота з сайта baj.by

Увечары 3 сакавіка відэаблогеру Андрэю Павуку патэлефанаваў незнаёмец з мабільнага нумара +375333104920, які назваўся Аляксандрам Фарыдавічам. Сувязь абарвалася. Праз тры хвіліны той жа незнаёмец тэлефанаваў ужо з нумара +79677314403 і заявіў, што ён намеснік начальніка ўпраўлення крымінальнага вышуку УУС Гомельскага аблвыканкама Файзулін Аляксандр Фарыдавіч, — паведаміў Андрэй Павук карэспандэнту службы маніторынгу ГА “БАЖ”.

Невядомы ад імя Файзуліна стаў выказваць на адрас блогера пагрозы: “Перастань запускаць ужо свае ролікі, уладкуйся на працу… Мы ж будзем супраць вас шукаць нейкія іншыя рычагі ўздзеяння. Ну штосьці, напрыклад, ад вашага імя замініраваць альбо знайсці забаронены які-небудзь прадмет у вас”.

Паводле слоў блогера, голас у мабільніку з кожнай хвілінай рабіўся ўсё больш жорсткім, адкідваліся ўсялякія сантыменты: “Давай, сынок, заканчвай усялякай ерундой займацца і бярыся за галаву, а не то сядзеш на доўга-доўга. Зразумеў?”

Андрэй Павук наважваўся задаць некалькі пытанняў “суразмоўцу”, кшталту, што ён парушае ці робіць няправільна? Але незнаёмец абрываў яго: “Таму што, бл… Не трэба пытанняў! Тут я пытанні задаю! Калі ты ўжо сядзеш туды, куды трэба, тады і будзеш ведаць, што парушыў”.

Адразу пасля размовы Павук патэлефанаваў на першы нумар, але на другім баку мужчына адказаў, што адбылася нейкая памылка — ён не тэлефанаваў блогеру.  І параіў званіць на нумар 102 у міліцыю.

Андрэй Павук запісаў пранкера і выклаў размову на YouTube, а яшчэ падрыхтаваў электронныя звароты ў пракуратуру, УУС і УКДБ з просьбай правесці праверку па згаданым факце, знайсці тэлефоннага хулігана і пакараць у адпаведнасці з заканадаўствам.

Нагадаем, што гэта ўжо не першая падобная пагроза на адрас вядомага блогера, заснавальніка суполкі ў сацыяльных сетках “Рудабельская паказуха” і відэаканала на YouTube  з такой жа назвай, дзе блогер мае звыш 13 тысяч падпісчыкаў. З прычыны пагроз і правакацый  у дачыненні Андрэя Павука ГА “БАЖ” накіроўвала  ліст міністру ўнутраных спраў Беларусі Юрыю Караеву з просьбай вызначыць зламысніка і прыцягнуць да адказнасці. Аднак органы ўнутраных спраў яго так і не выявілі. 


 Навіны ад Spring96.org у Telegram. Падпішыся на наш канал https://t.me/viasna96 

Апошнія навіны

Партнёрства

Сяброўства