Прапануюць адмяніць фінансаванне ўтрымання зняволеных. Чаму гэта лухта несусветная?

На сайте petitions.by 27 лютага з’явілася дзіўная петыцыя, якая заклікае адмяніць фінансаванне на ўтрыманне зняволеных у турмах і перавесці сродкі, прызначаныя для ўтрымання зняволеных, на лячэнне дзяцей. Праваабаронцы паспрабавалі разабрацца, што не так у гэтым не зусім дасведчаным звароце, які паспелі падпісаць ажно 144 чалавекі.

Што прапануюць ініцыятары петыцыі?

“Прапануем адмяніць фінансаванне турмаў і паставіць калоніі на самазабеспячэнне або арганізаваць фінансаванне зняволеных за кошт блізкіх сваякоў, добраахвотных ахвяраванняў і сродкаў заробленых самімі зняволенымі. Людзі, якія пацярпелі ад правапарушэнняў, у дачыненні да згаданых асоб не абавязаны плаціць за іх утрыманне, а на дадзены момант некаторыя бацькі забітых дзяцей павінны фінансаваць ўтрыманне забойцаў свайго падатку, у той час як на лячэнне нявінных дзяцей грошы збіраюць праз сацсеткі”, – гаворыцца ў тэксце, адрасаваным Савету міністраў Рэспублікі Беларусь.

Што кажуць у Дэпартаменце выканання пакаранняў?

«Павелічэнне аб'ёмаў выпуску прадукцыі на прадпрыемствах (ДВП) дазволіла зарабіць у 2018 годзе 11,745 мільёнаў рублёў чыстага прыбытку. Дасягнутыя вынікі работы арганізацый крымінальна-выканаўчай сістэмы дазволілі праводзіць будаўніцтва і рэканструкцыю, мадэрнізацыю і тэхнічнае пераўзбраенне вытворчасцяў. Уведзены ў эксплуатацыю шэраг вытворчых аб'ектаў: ​​вытворчы ўчастак філіяла «Даманава» дзяржаўнага прадпрыемства «Папраўчая ўстанова № 5» па выпуску паганажнай прадукцыі і мэблевага шчыта, цэх дрэваапрацоўкі на тэрыторыі дзяржаўнага прадпрыемства «ПК №20», выраблялася рэканструкцыя кацельні і сушыльнага комплексу дзяржаўнага прадпрыемства «Пятнаццаць». Таксама наладжана ўзаемавыгаднае супрацоўніцтва ў вытворчай сферы з прадстаўнікамі Расійскай Федэрацыі, Бельгіі, Вялікабрытаніі, Францыі, Чэхіі, Фінляндыі, Украіны, Польшчы, Венгрыі, Германіі, Літвы, Латвіі, Эстоніі, Турцыі, Казахстана, Пакістана, Ізраіля і Егіпта", - адзначыў намеснік начальніка ДВП МУС Алег Лашчыноўскі на нарадзе па выніках працы прадпрыемстваў крымінальна-выканаўчай сістэмы і лячэбна-працоўных прафілакторыяў за 2018 год і  задачах на 1-е паўгоддзе 2019 года.

Як рэагуюць эксперты па пытаннях маніторынгу месцаў прымусовага ўтрымання ў Рэспубліцы Беларусь?

Слова – юрысту Паўлу Сапелку:

"Гэтая петыцыя – адкрытая лухта, складнік белай пены. Можна было наогул яе не заўважыць – і яна б растварылася са сваім дзесяткам подпісаў. Такога непрыхаванага глупства ствараецца зараз шмат. Але з-за таго, што пра зняволеных шмат напісана, і грамадства ўжо трохі інфармавана, аб петыцыі сталі казаць.

Адкрыта недалёкія – у падтрымку, інфармаваныя – асуджаючы. Выкарыстоўваючы нагоду, яшчэ раз паўтараю: зняволеныя, як правіла, самі сябе ўтрымліваюць: яны аплочваюць сваё харчаванне, адзенне, пражыванне (ваду, цяпло і электрычнасць, прычым па тарыфах без ільгот, па эканамічна абгрунтаваных коштах).

Аплочваючы ежу, зняволеныя аплочваюць яшчэ і ўсе складнікі выдаткаў: ад самой ежы да транспарту, які яе прывязе ў калонію. Можна, вядома, заўважыць, што некаторыя зняволеныя не забяспечаныя працай і заробкам, і частку выдаткаў на іх проста спісваецца, але наогул, гэты папрок трэба адрасаваць адміністрацыі папраўчых устаноў або прадпрыемствам ДВП, якія не забяспечылі зняволеных – таннай і часта кваліфікаванай рабочай сілы, – працай.

А ахоўнікаў аўтары таксама прапануюць адправіць на самафінансаванне, па прынцыпе: пісталет далі – круціся як хочаш? Так, атрымліваецца, што такая лухта, як гэтая петыцыя часам дае падставу падумаць над сур'ёзнымі пытаннямі. Напрыклад, ці варта фінансаваць за кошт сродкаў дзяржбюджэту будаўніцтва жылых дамоў для супрацоўнікаў Дэпартамента выканання пакаранняў, ці варта караць пазбаўленнем волі тых, хто не ўяўляе вялікай грамадскай небяспекі і мог бы выправіцца без пазбаўлення волі; ці з'яўляюцца выдаткі бюджэту і існуючага на асаблівых умовах пазабюджэтнага фонду на мадэрнізацыю вытворчасцяў нашага мясцовага ГУЛАГа выдаткамі на ўтрыманне зняволеных?"