Дэпутаты прынялі законапраект пра адтэрміноўку ад войска ў першым чытанні Дапоўнена

2019 2019-06-26T12:29:08+0300 2019-06-26T16:38:52+0300 be https://spring96.org/files/images/sources/vojska_.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Фота Reuters

Фота Reuters

У сераду, 26 чэрвеня, дэпутаты Палаты прадстаўнікоў Нацыянальнага сходу Беларусі разгледалі ў першым чытанні законапраект пра адтэрміноўку ад войска, піша Еўрарадыё. Пра гэта паведаміла дэпутат Ганна Канапацкая

"Праект вельмі сыры, з вельмі неадназначнымі нормамі, якія ствараюць пагрозу інтэлектуальнаму патэнцыялу нашай краіны і прывядуць як мінімум да масавай эміграцыі беларускай моладзі", — мяркуе Канапацкая.

Яна піша на сваёй старонцы ў Facebook, што яшчэ ёсць шанец змяніць законапраект і яна працуе над праўкамі.

У інтэрнэце збіралі подпісы супраць новага закона пра адтэрміноўку ад войска. Больш за 10 000 подпісаў былі накіраваныя ў Палату прадстаўнікоў да пачатку яе паседжання. Між іншым, беларусы не згодныя, што прапануецца даваць адтэрміноўку ад войска толькі адзін раз.

У выніку галасавання законапраэкт у першым чытанні быў прыняты Палата Прадстаўнікоў: 87 дэпутатаў прагаласавала "за", шэсць - "супраць" і сямёра - "не галасавала". 

На 28 чэрвеня запланавы разгляд законапраекта ў другім чытанні. 

Якія асноўныя новаўвядзенні будуць разглядаць дэпутаты і чаму людзі супраць законапраекта — у разборы Еўрарадыё. 

1. Адтэрміноўкі ад арміі

Адтэрміноўка ад арміі для атрымання адукацыі будзе давацца толькі адзін раз. Гэта значыць, калі малады чалавек адвучыўся ў ВНУ, то перад магістратурай ён павінен будзе адслужыць у арміі. Калі малады чалавек адвучыўся ў каледжы або іншай установе сярэдняй спецыяльнай адукацыі, то перад паступленнем у ВНУ ён павінен будзе адслужыць у арміі.

2. "Тыя, хто не прайшоў воінскую службу па прызыве не маючы на тое законных падстаў"

"У выпадку ўхілення грамадзян, якія не знаходзяцца ў запасе, ад прызыву на тэрміновую ваенную службу, службу ў рэзерве да дасягнення ўзросту 27 гадоў або невыканання імі абавязкаў па воінскім уліку, устаноўленых гэтым Законам, з прычыны чаго стала немагчымым іх апавяшчэнне пра неабходнасць яўкі на мерапрыемствы па прызыве на тэрміновую ваенную службу, службу ў рэзерве, раённая (гарадская) прызыўная камісія прымае рашэнне аб прызнанні такіх грамадзян тымі, хто не прайшоў ваенную службу па прызыве не маючы на ​​тое законных падстаў", — гаворыцца ў праекце закона.

Гэта азначае, што чалавека прызнаюць тым, хто не мае законных падстаў для непраходжання воінскай службы, нават калі адказныя асобы не змаглі ўручыць яму павестку асабіста. Дастатковым апавяшчэннем пра прызыў будзе лічыцца сам факт адпраўкі павесткі прызыўніку, а калі ён яе па нейкіх прычынах не атрымаў, гэта будуць яго праблемы.

Тое самае датычыцца і афіцэраў запасу, якія ўхіляюцца ад прызыву на зборы.

"Існуючы парадак абскарджвання рашэнняў прызыўных камісій выкарыстоўваецца грамадзянамі як механізм ухілення ад праходжання воінскай службы. Наўмыснае невыкананне без законных падстаў воінскага абавязку грамадзянамі не з'яўляецца перашкодай для заняцця імі ў далейшым пасад дзяржаўных служачых, праходжання службы ў воінскіх фарміраваннях і ваенізаваных арганізацыях. Такое становішча рэчаў не карэлюе з наяўнасцю канстытуцыйнага абавязку і свяшчэннага доўгу грамадзян Рэспублікі Беларусь па абароне Рэспублікі Беларусь", — пазначана ў абгрунтаванні неабходнасці прыняцця праекта закона.

3. Абмежаванні на выезд з Беларусі

Адсутнасць законных падстаў для непраходжання службы ў арміі прывядзе да таго, што чалавека ўнясуць у спіс невыязных з Беларусі. Цяпер так паступаюць толькі з ухілістамі — тымі, хто атрымаў павестку, але праігнараваў прызыў.

4. Абмежаванні на працу

Калі чалавека прызнаюць тым, хто не мае падстаў для непраходжання службы ў арміі, яго будзе забаронена браць на працу:

  • на дзяржаўную службу;
  • у Следчы камітэт;
  • у МНС;
  • у органы ўнутраных спраў;
  • у органы фінансавых расследаванняў Камітэта дзяржкантролю;
  • у Дзяржкамітэт судовых экспертыз.

5. Замена працы па размеркаванні службай у арміі

Праектам закона прадугледжаны змяненні ў Кодэкс аб адукацыі. Прапануецца дазволіць выпускнікам, якім трэба будзе працаваць па размеркаванні, замест размеркавання адслужыць у арміі. У гэтым выпадку ім не трэба будзе кампенсаваць ВНУ грошы, выдаткаваныя на навучанне:

"Выпускнікі, якім месца працы дадзена шляхам размеркавання, накіраваныя на працу ў адпаведнасці з дагаворам аб падрыхтоўцы навуковага работніка найвышэйшай кваліфікацыі за кошт сродкаў рэспубліканскага бюджэту, дагаворам аб мэтавай падрыхтоўцы спецыяліста (рабочага, служачага), якія добраахвотна паступілі на ваенную службу па кантракце ва Узброеныя Сілы Рэспублікі Беларусь, іншыя войскі і воінскія фарміраванні Рэспублікі Беларусь і праслужылі не менш за тэрмін абавязковай працы, вызваляюцца ад вяртання ў рэспубліканскі і (або) мясцовыя бюджэты сродкаў, затрачаных дзяржавай на іх падрыхтоўку".

Закон зваротнай сілы не мае: новаўвядзенні не закрануць тых, каму да моманту яго ўступлення ў сілу споўніцца 27 гадоў. Але калі на момант уступлення дакумента ў сілу малады чалавек ужо атрымаў адну адтэрміноўку ад войска для атрымання/працягу адукацыі, то права на другую адтэрміноўку ў яго ўжо не будзе.

Апошнія навіны

Партнёрства

Сяброўства