Праваабаронцы супраць пераследу за выказванне меркавання ў сацсетках
Праваабаронцы ў Гомелі Андрэй Стрыжак і Леанід Судаленка апавясцілі гарвыканкам аб правядзенні 15 жніўня спецыяльнага пікету, мэтай якога з'яўляецца зварот увагі грамадскасці на частыя выпадкі пераследу уладай грамадзян за выказванне сваіх меркаванняў у глабальнай камп'ютэрнай сетцы Інтэрнэт, у тым ліку і за размяшчэнне ў сацыяльных сетках інфармацыі крытычнага ўтрымання. Аб гэтым паведамляе мясцовы праваабарончы сайт "Гомельская вясна".
Нагадаем, апошнія папраўкі ў закон аб масавых мерапрыемствах дапускаюць менавіта паведамляльны характар мірных сходаў, калі мерапрыемства плануецца праводзіць у спецыяльна прызначаным уладамі месцы. Пікетаванне плануецца правесці на афіцыйна дазволеным гомельскімі ўладамі месцы - адкрытай пляцоўцы перад ДК ПУП «Віпра» па вул. Юбілейнай, 48 абласнога цэнтра.
Праваабаронцы адзначаюць, толькі ў апошні час за выказванне меркаванняў у сацсетках пераследу падвергліся вядомыя блогеры Сяргей Пятрухін ў Брэсце і Андрэй Павук з райцэнтра Акцябрскі. У Рэчыцы за пасаду ў Фэйсбуку крымінальнаму пераследу падвяргаецца грамадскі актывіст Алег Шабетнік, у Гомелі ўлада пераследуе у адміністрацыйным парадку блогера Арцёма Шапорава, за репост у Фэйсбуку міліцыя накіравала позвы і ў любы час можа пачаць адміністрацыйныя працэсы ў адносінах да абаронцы Курапатаў Барыса Анікеева і праваабаронцы Леаніда Судаленка.
"Рана называць паведамляльны прынцып пазітыўным зменай. Пакуль няма практыкі - незразумела ці будзе гэтая норма працаваць для ўсіх, ці толькі для праўладных "саветаў ветэранаў" і іншых падобных арганізацый. Таксама не варта забываць і пра тое, што па-ранейшаму ад арганізатараў патрабуюць аплаты працы хуткай дапамогі і іншых структур. Такія патрабаванні з'яўляюцца сур'ёзным абмежаваннем свабоды выказвання меркаванняў і свабоды мірных сходаў", - заявіў кіраўнік гомельскага офіса ПЦ "Вясна" Андрэй Стрыжак.
Праваабаронца і юрыст рэгіянальнай прававой прыёмнай ПЦ "Вясна" Леанід Судаленка падкрэслівае, што права на выказванне меркавання не з'яўляецца абсалютным, яно можа падлягаць пэўным абмежаванням.
"Крымінальныя справы і адміністрацыйныя працэсы ўзбуджаюцца па заявах грамадзян, якіх "ашальмавалі". Іх меркаванні аб паклёпе заўсёды з'яўляюцца суб'ектыўнымі. Трэба спыніць умяшальніцтва дзяржавы ў гэтыя працэсы, тут павінна дзейнічаць грамадзянска-прававая адказнасць. Іншымі словамі, грамадзяне, якіх "ашальмавалі" самастойна могуць пачаць у судзе працэс за паклёп, не звяртаючыся да рэпрэсіўных механізмаў дзяржавы", - лічыць праваабаронца Леанід Судаленка.
Ён таксама адзначыў, што запланаваная акцыя з'яўляецца свайго роду тэставаннем мясцовых чыноўнікаў на апошнія папраўкі ў закон аб масавых мерапрыемствах.
