Колькі каштуе літара ў слове “Дэкрыміналізацыя”?
Пікет на плошчы Незалежнасці насупраць Дома ўрада у Мінску 2 красавіка.
Суд Маскоўскага раёна Мінска разгледзеў 25 красавіка адміністрацыйную справу актывіста кампаніі Legalize Belarus Стаса Шашка. Паводле пратакола правапарушэння, ён браў удзел у пікеце за дэкрыміналізацыю артыкула 328 Крымінальнага кодэкса, які прайшоў на плошчы Незалежнасці насупраць Дома ўрада у Мінску 2 красавіка.
Шашка прызналі вінаватым у парушэнні часткі 3 арт. 23.34 КаАП РБ (арганізацыя або ўдзел у несанкцыянаваным масавым мерапрыемстве) і пакаралі штрафам у памеры 25 базавых велічыняў.
Гэта ўжо чацвёрты прысуд за ўдзел у пікеце “Дэкрыміналізацыя”.
На наступны дзень пасля акцыі супрацоўнікі міліцыі зладзілі затрыманне траіх удзельнікаў пікету: Алеся Таўстыкі, Вячаслава Касінерава і Пятра Маркелава.
3 красавіка Суд Маскоўскага раёна г. Мінска аштрафаваў актывіста Алеся Таўстыку на 15 базавых велічыняў (367,75 рублёў) па ч.3 арт. 23.34 КаАП Рэспублікі Беларусь.
Працэсы над затрыманымі Вячаславам Касінеравым і Пятром Маркелавым адбыліся ў судзе Маскоўскага раёна 4 красавіка. Згодна з пастановай суда, іх аштрафавалі на 25 базавых велічынь кожнага.
Ноч да суда юнакі правялі ў ізалятары часовага ўтрымання.
