Гарадзенца звольнілі з працы за выбары
Ігар Дзьячкоў.
Не паспела яшчэ стартануць сёлетняя выбарчая кампанія, як на агульным фоне зняцця санкцый і нібыта пацяплення у стасунках Беларусь-Захад працягваецца пераслед актывістаў. Кіраўніцтва Гарадзенскай абутковай фабрыкі звольніла з працы грамадскага актывіста Ігара Дзьячкова, недвухсэнсоўна даўшы яму зразумець, што галоўныя іх прэтэнзіі да яго гэта актыўны ўдзел у выбарчых кампаніях у якасці назіральніка ад Праваабарончага цэнтра "Вясна". Ігар Дзьячкоў таксама з’яўляецца сябрам Беларускай сацыял-дэмакратычнай партыі „Грамада” і Беларускага прафсаюза работнікаў радыёэлектроннай прамысловасці.
Прычына звальнення – палітычная дзейнасць актывіста, які падчас выбараў быў назіральнікам ад Праваабарончага цэнтра “Вясна”. Ігару Дзьячкову паведамілі пра гэта ў адміністрацыі абутковай фабрыкі:
– Была размова з дырэктарам. Працаваў 18 гадоў. Пытаюся, што здарылася, каму я перашкаджаю? Кіраўніцтва, іх намеснікі паглядзелі, што браў удзел у выбарах. Быў выпадак таксама, калі мяне не было на працы, а прыходзілі людзі ў пагонах і шукалі мяне па горадзе. У іх такія пытанні: “Што табе не падабаецца?”
Яшчэ адна прычына звальнення, на думку Ігара Дзьячкова, палягае на яго актыўнай пазіцыі па абароне правоў працоўных. Грамадскі актывіст, які з’яўляецца высока-кваліфікаваным слесарам кантрольна-вымяральных прыбораў, нястомна дамагаўся падвышэння заробкаў на абутковай фабрыцы.
