Супольная праца беларускіх і ўкраінскіх праваабаронцаў
Круглы стол па тэме “Рэалізацыя правоў дзяцей-сірот і пазбаўленых бацькоўскай апекі ў Адэсе.
30 сакавіка ў Адэсе адбыўся круглы стол па тэме “Рэалізацыя правоў дзяцей-сірот і пазбаўленых бацькоўскай апекі, а таксама асоб з іх ліку на забеспячэнне жыллём. Мерапрыемства было арганізаванае грамадскім саюзам «Альянс па абароне правоў дзяцей». На сустрэчы прысутнічалі прадстаўнікі органаў абласной і гарадской улады, грамадскасці, прадстаўнікі мэтавай групы, праваабаронцы з Беларусi, рэгіянальны прадстаўнік Упаўнаважанага па правах дзіцяці.
Пад час працы круглага стала яго ўдзельнікі распавядалі, што дзеці-сіраты пасля знаходжання ў дзіцячых дамах атрымліваюць нейкую адукацыі і прафесію, пасля чаго дзяржава, адпаведна заканадаўству Украіны мусіць забяспечыць іх жыллём. І вось тут узнікае праблема. Напрыклад, за 2015 год ў Адэскай вобласці не было набыта ніводнай кватэры для гэтай катэгорыі грамадзян, хаця на дадзены момант 1906 чалавек маюць у гэтым патрэбу (з іх – каля 500 дзяцей да 18 гадоў).
Як паведаміў прадстаўнік Праваабарончага цэнтру “Вясна” Зміцер Салаўёў, які дапамагае украінскім партнёрам у межах міжнароднага праекта правядзення адвакацыйных кампаній ва Украіне і Беларусі, сярод прычын такой сітуацыі – “недастатковае фінансаванне. Скончылася спецыяльная праграма па забеспячэнні жыллём, якая была раней распрацаваная і дзейнічала. Зараз неабходна ствараць Рабочую групу па распрацоўцы новай падобнай праграмы і ўлічыць у ёй некаторыя ньюансы. Напрыклад, частка кватэр і іншай маёмасці, якія заставаліся ў дзяцей сірат ці іх сваякоў, пакуль яны былі ў дзіцячых дамах, кудысці знікла. Іх трэба шукаць”.
Гэтая інфармацыя была агучаная прадстаўнікамі арганізацый саміх сірат і прыцягнула ўвагу мясцовых журналістаў.
– Пасля круглага стала і нашага выступу на мясцовым тэлебачанні журналісты ўзнялі гэтую тэму больш актыўна, сталі з’яўляцца сюжэты па якіх бачна, напрыклад, як чалавека не пускаюць у інтэрнат, паколькі выйшаў тэрмін пражывання. Людзі вымушаныя начаваць у пад’ездах і іншых непрыстасаваных месцах. Ім няма куды дзецца. Таму абмяркоўвалася ідэя рэканструкцыі пакінутага занядбанага жылля, якое можна прыстасаваць для жылля такой катэгорыі грамадзян, ці інтэрнатаў для часовага пражывання. Бо цяпер, у падобных інтэрнатах сіратам дазваляецца пражываць не больш за тры месяцы, – кажа Зміцер Салаўёў. – Мы праводзім некалькі адвакацыйных кампаній як ва Украіне, так і Беларусі. Нядаўна пачалася кампанія па абароне правоў на беларускамоўную школьную адукацыю ў рэгіянальных гарадах, а ва Украіне плануецца круглы стол разам з украінскімі партнерамі па абароне правоў інвалідаў на безбар’ернае асяроддзе, таксама будзем разам займацца кампаніямі па дапамозе часова пераселеным асобам з зоны АТА. Па-сутнасці, гэта працяг таго, чым мы займаліся раней пад час нашай Гуманітарнай праваабарончай місіі на Украіне, у Харкаве. Зараз мы гэта робім больш шырэй і больш спецыялізавана.
