Праваабарончая праграма “Вясна” на Беларускім Радыё Рацыя
Кожны аўторак у 22:00 (паўтор у суботу ў 7:00) у эфіры незалежнай радыёстанцыі “Беларускае Радыё Рацыя” - праграма "Вясна", якая асвятляе падзеі, датычныя правоў чалавека на Беларусі.
Анонс выпуска:
“Хроніка”: На незалежную журналістку з Брэста Аліну Літвінчук завялі чарговую адміністрацыйную справу; Алесь Бяляцкі стаў госцем святочнай сустрэчы Amnesty International у Польшчы; Генпракуратура вынесла вайскоўцам папярэджанне за парушэнне моўнага заканадаўства.
"Каментар": Актывіст “Еўрапейскай Беларусі” Леанід Кулакоў распавёў пра ўмовы ўтрымання ў Смалявічскім ізалятары часовага ўтрымання, дзе правёў 7 сутак адміністрацыйнага арышту.
“Падзея”: 20 і 21 траўня ў Рызе праходзіў Форум грамадзянскай супольнасці Усходняга партнёрства, тэма якога сёлета стала “Пашырэнне магчымасцяў грамадзянскай супольнасці ва Усходнім Партнёрстве: Бягучыя праблемы і будучыя сцэнары”. У Форуме браў ўдзел старшыня ПЦ “Вясна” і віцэ-прэзідэнт Міжнароднай Федэрацыі за правы чалавека Алесь Бяляцкі, які звярнуў асобную ўвагу на важнасць падтрымкі грамадзянскай супольнасці і яе ролю ў развіцці грамадства і ўзаемадзеянні з Еўропай.
Госць рубрыкі “Асоба”: каардынатар праграмы “Беларуская праваабарончая школа” Андрэй Палуда, якая сёлета распачала новы набор удзельнікаў на летнія школы па правах чалавека. У межах праграмы ўдзельнікі знаёмяцца з гісторыяй і філасофіяй правоў чалавека, а таксама метадамі і сродкамі іх абароны на нацыянальным і міжнародным узроўнях.
У музычных паўзах - кампазіцыі гурта 5’nizza.
