Абласны суд прызнаў факт неналежнага выканання работнікамі Баранавіцкага гарадскога суда службовых абавязкаў
Будынак суду ў Баранавічах
Брэсцкі абласны суд прызнаў факт неналежнага выканання работнікамі суда Баранавіцкага раёна і г. Баранавічы службовых абавязкаў па вядзенні справаводства ў частцы арганізацыі работы з дакументамі, якія паступаюць у суд, іх першапачатковай апрацоўкі, рэгістрацыі, перадачы на выкананне і наступнага разгляду. Гэты вынікае з ліста, які атрымаў праваабаронца Сяргей Гоўша з Брэсцкага абласнога суда за подпісам старшыні суда Тамары Сучок.
Яшчэ ў снежні 2014 года Сяргей Гоўша і адвакат Карней Пятровіч спрабавалі аказаць юрыдычную дапамогу асуджанаму па адміністрацыйнай справе (арт. 17.1) Дзмітрыю Палойку, які быў затрыманы супрацоўнікамі міліцыі і КДБ, а затым асуджаны гарадскім судом на 10 сутак адразу па вяртанні з Украіны.
Адвакат асуджанага напісаў заяву для допуску да адміністрацыйнай справы Палойкі, якую падпісаў намеснік старшыні суда Петрыў В.А. Аднак у канцылярыі суда па адміністрацыйных справах яму заявілі, што такой справы Палойкі Д. Ю. у іх няма ў наяўнасці!
Таму праваабаронца Сяргей Гоўша напісаў скаргу і прасіў старшыню абласнога суда правесці расследаванне гэтай справы і вызначыць прычыны ўкрывання парушэння закону судом Баранавіцкага раёна і г. Баранавічы намеснікам старшыні суда Петрывам В. А. і прыцягнуць вінаватых да адпаведнай закону адказнасці.
У адказе старшыні Брэсцкага абласнога суда Тамары Сучок паведамляецца, што скарга Сяргея Гоўшы не толькі разгледжана, але была праведзена службовая праверка, якая і ўстанавіла факт неналежнага выканання работнікамі суда Баранавіцкага раёна і г. Баранавічы службовых абавязкаў. Аб гэтых недахопах у працы, падсумоўвае старшыня аблсуда Тамара Сучок, будзе належным чынам паведамлена суду першай інстанцыі.
