Апытанне “Intex-press” : барацьбу індывідуальных прадпрымальнікаў за свае правы падтрымалі 45%
Баранавіцкая недзяржаўная газета “Intex-press” 13 ліпеня падвяла вынікі апытання сваіх чытачоў, у якім прынялі ўдзел 387 чалавек. На пытанне папулярнай у горадзе газеты: “Як вы ставіцеся да страйку прадпрымальнікаў на рынках горада?” прагучалі наступныя адказы:
45 % чытачоў сайта падтрымалі барацьбу індывідуальных прадпрымальнікаў за свае правы, а 23 % адмоўна паставіліся да такіх дзеянняў, спаслаўшыся на тое, што сертыфікацыя прадукцыі неабходна для бяспекі пакупнікоў. 12 % апытаных таксама адмоўна паставіліся да страйку мясцовых ІПэшнікаў, адзначыўшы, што яны заўсёды знойдуць магчымасць зарабіць сабе на жыццё. 20 % прагаласаваўшых наведвальнікаў сайта intex-press.by не вераць, што прадпрымальнікі змогуць нечага дабіцца ў сёняшніх умовах працы і жыцця.
Нагадаем, што з 1 па 7 ліпеня баранавіцкія прадпрымальнікі праводзілі калектыўны страйк, выказваючы сваю нязгоду з указам Прэзідэнта № 222, які істотна ўскладніў іх працу. 8 ліпеня яны спынілі страйк і выйшлі на працу.
