Дэпутатам сельсавету ў Бярозаўскім раёне дагэтуль не выдалі пасведчанні
Валерый Білібуха, які з’яўляецца сябрам аргкамітэту па стварэнні партыі “Беларуская Хрысціянская Дэмакратыя”, ёсць адзіным з дэмакратычных актывістаў, што здолеў стаць дэпутатам мясцовага савету.
Актывіст БХД балатаваўся па Жычынскай акрузе ў Першамайскі сельсавет Бярозаўскага раёна і атрымаў перамогу як на датэрміновым галасаванні, так і ў асноўны дзень выбараў. Сваю вядомасць у гэтай акрузе Білібуха атрымаў падчас знішчэння мясцовымі ўладамі сялянскіх гаспадарак пад выглядам барацьбы з афрыканскай чумой свіней. У час перадвыбарчай кампаніі Валерый адстойваў інтарэсы грамадзян, якіх спрабавалі пазбавіць магчымасці трымаць хатніх жывёл.
Нягледзеячы на тое, што з моманту выбараў прайшло ўжо больш за тры месяцы, і сельсавет рэгулярна збіраецца на свае паседжанні, ні Білібуха, ні іншыя дэпутаты Першамайскага сельсавета дагэтуль не атрымалі дакументаў, якія б сведчылі, што яны з’яўляюцца народнымі абраннікамі.
