Аркадзя Бялоцкага аштрафавалі на 620 тысяч за выратаванне дзіка
На гаспадарчым падворку жыхара вёскі Вялікія Аўцюкі Аркадзія Бялоцкага дзік Борка жыве каля года. Знясіленага і падраненага, яго выратаваў і выхадзіў пенсіянер з вёскі Хобнае Рыгор Шаўлоўскі, паведаміла Еўрапейскае радыё для Беларусі.
Потым сталы чалавек пайшоў з жыцця, і яго дзеці перадалі лясную жывёлу свайму знаёмаму ў Вялікія Аўцюкі. Там Борка і гадаваўся, харчаваўся “Педзігрыпалам”.
Але на пачатку траўня да Аркадзія Бялоцкага завіталі супрацоўнікі Гомельскай абласной інспекцыі па ахове жывёльнага і расліннага свету і аштрафавалі яго на 620 тысяч рублёў. За “забіранне жывёлы з дзікай прыроды і ўтрыманне ў няволі без адпаведнага дазволу”.
Намеснік кіраўніка інспекцыі Уладзімір Вусачоў кажа, што прыехалі яны ў Вялікія Аўцюкі па “сігнале” грамадзян, занепакоеных здароўем жывёлы.
Уладзімір Вусачоў: “Паступіла інфармацыя ад паляўнічых, жыхароў Калінкавічаў, што таварыш Бялоцкі цкуе сабак сваіх і сваіх сяброў на дзіка. З гэтай мэтай ён яго і ўтрымлівае”.
Таму, кажа, усе гаворкі пра харчаванне дзіка “Педзігрыпалам”, хлусня. Ставіць чыноўнік прыродаахоўнай інспекцыі пад сумнеў і тое, якім чынам дзік патрапіў да Аркадзя Бялоцкага.
Уладзімір Вусачоў: “Наколькі я ведаю па размовах з паляўнічымі, дабразычліўцамі і г.д., гэты дзік быў упаляваны з дапамогай сабак. Яны яго затрымалі. Потым яго скруцілі, ён яшчэ маленькі быў, і прывезлі на падворак”.
Гэта ж, кажа Уладзімір Вусачоў, з’яўляецца парушэннем правілаў вядзення палявання і паляўнічай гаспадаркі. Згодна з чым яго і аштрафавалі на 20 базавых велічынь. Праўда, чыноўнік так і не патлумачыў, чаму ў складзеным на Аркадзя Бялоцкага пратаколе адсутнічае пункт “здзек над жывёлай”.
Сігнал пра яго і вымусіў інспектараў прыехаць з Гомеля ў Вялікі Аўцюкі. Але адказ быў знойдзены ў кіраўніка абласнога камітэта прыродных рэсурсаў і аховы навакольнага асяроддзя Андрэя Кузьменкі, які таксама прыязджаў “да дзіка ў госці”.
Андрэй Кузьменка: “На момант праверкі дзік быў “чысты”: вушы не парваныя, сабак ён не баяўся. Увогуле, слядоў нацкоўвання сабак не было”.
Кіраўнік абласнога камітэта быў уражаны, якім дагледжаным выглядае дзік. Нават бачыў вялікую колькасць пакункаў з “педзігрыпалам”, які акрамя дзіка есці больш няма каму. Таму, улічваючы тое, як цяжка выгадаваць “ручнога” дзіка, Андрэй Кузьменка лічыць, што жывёлу лепш пакінуць у Аркадзя Бялоцкага, чым адпраўляць яго ў заапарк, як гэта прапаноўвае зрабіць Уладзімір Вусачоў.
Так Андрэй Кузьменка і напісаў у Мінпрыроды, куды Аркадзь Бялоцкі звернуўся па дазвол на ўтрыманне дзіка. А такі дазвол, пры наяўнасці адпаведнай заяўкі, робіцца бясплатна на працягу месяца.
Андрэй Кузьменка: “Гомельскі абласны камітэт не супраць утрымання ў няволі дзіка. Пры ўмове ўзгаднення з Калінкавіцкім лясгасам”.
Выплачваць штраф Бялоцкі адмовіўся, але прыродаахоўнікі накіравалі пазоў яму на працу, і бухгалтэрыя вымушана будзе вылічваць грошы з заробку. Праз тыдзень пасля пачатку інцыдэнта да Аркадзя Бялоцкага прыехалі нейкія людзі.
Прадставіліся супрацоўнікамі абласнога Савета таварыства паляўнічых і рыбаловаў і хацелі забраць дзіка, каб натрэніроўваць на ім сабак. Нават прапаноўвалі заплаціць 100 тысяч. Не аддаў.
Хто гэта быў насамрэч, Еўрарадыё высветліць не ўдалося. Кінолаг таварыства Віктар Леснікоў катэгарычна заяўвіў, што ад іх ніхто ў Вялікія Аўцюкі не ездзіў.
Што чакае дзіка, пакуль не вядома. Аркадзь Бялоцкі не верыць у добрыя намеры прыродаахоўнікаў і кажа, што лепш прагоніць Борку у лес.
